拿督千金输镬甘　庄思敏买㓥舖、纳米楼、的士牌全败阵｜楼市灯神

涉资至少近14亿元的JPEX案轰动全城，全港有多达超过2,000人怀疑中招受骗。向来热衷投资嘅拿督千金、艺人庄思敏亦卷入事件当中，日前仲主动联络警方，由大马赶回香港协助调查，仲话自己都成为苦主之一，预计喺JPEX案中会损失约50万元。灯神睇返庄思敏过去投资战绩，无论喺物业投资定系今年先开始投资嘅的士牌，似乎真系“玩边样输边样”，绝对称得上为“投资界明灯”。

庄思敏过去投资战绩差劣，一早已经被外界形容为“地狱黑仔王”、“灯神界KOL”，事关佢近年几乎“买乜输乜”，完全离不开“输钱”两只字！最令灯神印象深刻，就系拿督千金早年趁零售市道处于上升周期，大胆投资铜锣湾“㓥舖”，早喺2005年同人夹份以180万元买入铜锣坊商场一个㓥舖，面积仅仅只有40平方呎。

步家燕姐后尘　投资㓥舖惨败

虽然合资买舖可以分担风险，不过㓥场舖位往往都离不开大幅蚀让嘅命运，最终依个㓥舖就喺2021年5月份以60万元沽出，即系帐面足足蚀咗120万元或67%，暂时成为咗庄思敏最蚀嘅一次投资，亦成为家燕姐佐敦广场㓥舖惨输9成后的另一演艺界悲剧！

六球买何文田纳米楼　楼上同类单位要蚀15%

除咗㓥舖惨痛经历外，庄思敏似乎都几钟意面积细小嘅物业，佢喺2017年4月就斥资逾626万元买入何文田加多利轩一个实用面积264平方呎嘅“纳米楼”，呎价高达23,828元，贪佢位处市区容易收租。

但众所周知，近一至两年香港地蚀得最甘就系纳米楼，基本上市区纳米单全方位爆出蚀让潮，闲闲地都要输10至20%。睇返近期的成交纪录，庄思敏持有嘅单位，楼上高几层嘅同类户型已经出现蚀让15%，成交价已降至590万元，照咁睇庄思敏所持单位，相信都已经出现帐面贬值嘅情况。

买的士牌后随即遇牌价急挫　市区的士牌曾跌至357万

除著物业投资“头头碰着黑”，热衷投资嘅庄思敏近年亦开始改变策略，不过眼光方面依然“麻麻地”。佢早前喺6月份就透露转战其他范畴，以400万元向歌手AGA（江海迦）未婚夫郑子邦（的士邦）购入的士牌投资，不过的士牌随即下跌。睇返香港的士文易所资料显示，市区的士牌最新报价由6月份415万跌至最新的385万元，但值得留意其实8月底，市区的士牌价更低见357万元。

投资加密货币料损手50万

至于庄思敏最新卷入的JPEX案，听闻佢都成为苦主之一，仲透露自己喺事件中损失咗大约50万元。虽然暂时仲未知JPEX案未来发展情况，但系估计都系难以出金，睇怕庄思敏都要有心理准备，预计全数50万元将会Total Loss。