U型反弹落空　施永青转軚睇淡入熊　无意帮代理锄价！｜楼市灯神

近期楼市充斥多项负面因素，二手楼日日都有蚀让，发展商卖全新楼又低价开盘，最近就连坚尼地城嘅临海地皮，成交呎价都系得7,000元，创咗港岛区过去21年新低纪录。龙头地产代理行中原嘅创办人施永青亦对下半年睇得好淡，仲话楼市或者会步入熊市，下半年唔好旨意牛市会重临。

虽然言论相当悲观，但灯神发现其实施生喺今年年初都仲睇好楼市，当时甚至认为本港楼市已经见底，更加预计港楼价出现U型反弹。不过近排就急转弯，睇淡楼市进一步下挫，更有机会步入熊市。

年初料楼价U型反弹

灯神亲自打去问下施生，点解只喺短短半年间，对楼市睇法咁大出入？施生佢就话，本身年初系预计楼市会出现小阳春，之后随住通关复常慢慢回稳，最终就会出现大升市。不过最终大升市就冇出现，楼市就喺出现咗轻微反弹。

相关文章：施永青：本港楼市已见底　料未来呈U型反弹

网民投诉常转軚　“唔会一个睇法坚持到最后”

施生又话，其实自己从来都唔会话每隔几多个月，就会审视、改变楼市睇法，不过就直言“自己个脑喺不断变，从来都唔会喺一个睇法坚持到最后！”

对于好多网民笑指施生睇楼市成日转軚，施生就话“冇我从来冇叫人信我讲果啲嘢（个人睇法）”，认为一般市民大众置业时，都要自己做返判断，直言“生命系你嘅、财富系你嘅”，个人睇法纯粹参考下就可以，无必要一定要跟从。

睇淡入熊似出口术锄价？　“唔会笨到借传媒过桥嚟锄价”

施生言论向来出位，有网民就觉得施生作为龙头代理行老板，其实每次发言都唔多唔少算喺出口术，帮下一众地产代理锄价。不过施生就同灯神讲实属冤枉，话自己言论从来冇考虑依啲因素，亦都唔会笨到借传媒过桥嚟锄价，咁样做只会破坏咗社会大众对佢自己一直嘅信任，直言发表自己嘅楼市睇法，绝对没有何阴谋论！佢又同网民讲，可以不认同佢个人睇法，但就唔好作胡乱猜测。

发表言论没考虑私利　不想破坏社会的信任

施生又同灯神讲，其实自己一直都会有一套睇楼市嘅标准，好似每年香港经济增长情况、市民可负担能力、未来经济前景有没有暗藏危机等基础因素。不过依家普遍市民买楼意欲有所降低，其实反映紧市民对楼市前景睇唔清，担心买入之后又再跌，所以普遍市民都系观望市况，直至可以睇清个市先会做置业决定。