放宽按揭说爱你！　加息未完　加入托市大军忌心雄借尽｜楼市灯神

财爷陈茂波 （波叔）近月一直吹风话同金管局研究微调措施照顾换楼需求，最终金管局喺7月上旬就正式公布咗详情，以后楼价1,500万元以下嘅住宅物业都可以承做7成按揭，比起以往5成按揭大幅度放宽！不过咁样做系帮紧市民上车？定系令到一众首置人士陷入供楼危机之中呢？

财爷声称要照顾换需求，但若果以阴谋论角度嚟睇，其实又算唔算另一种形式嘅托市，或者另一种形式嘅“抢人才、留人才”政策呢？虽然楼价未必会因此出现反弹，但至少唔会再一潭死水，灯神估计中小型住宅单位交投量都会有所上升，而且部份本地后生仔都乖乖地留返喺香港继续供楼，咁就唔洗下下揾外劳、揾外国专才，香港社会就得以继续保持发展。

首付大减40%　按揭贷款同样大增40%

灯神睇返放宽按揭成数后嘅最新安排，楼价1,500万元住宅物业，本来最多只可借5成按揭，就咁计即系首付750万元，再问银行借750万元，而调整之后，按揭成数大增40%至7成，即系首付降至只需要450万元，占楼价30%，与此同时按揭贷款就会急升到1,050万元，劲升40%。

市民或心雄借尽买大啲、买豪啲

以上首付同贷款嘅变化，相信会令到好多本身首付唔算太多嘅市民，都会突然够预算可以“买大啲、买贵啲、买豪啲”。灯神觉得其实买楼一向人生大事，好多人可能一生人只会买一次楼，如果按揭制度系容许佢地借到尽买大啲，依班市民真系会心雄入市买个大单位。

置业人士需计预留流动资金

喺新措施下借尽入市其实冇问题，但喺问题系依家息口高企，心雄入市嘅买家真系要小心啲，始终“借大咗、供楼又供多咗”，如果计到尽，流动资金又唔够搞到供唔掂，真系要小心被银行CALL LOAN沦为银主盘。

要知道其实有唔少本身实力雄厚嘅老牌投资者，近年都被银行、银主要求减磅，以减低风险，如果息口继续攀升，又有大批市民借尽入市，银行CALL LOAN难免会蔓延至依班小业主身上。

承做按揭保险可借楼价8成

另外，我哋又可以望一望按证公司调整按保计划后嘅新安排，如果买家想采用按保，买入楼价1,500万元住宅物业，按揭成数系可以由7成，进一步提升至8成，即系首付资金再减少至到300万元。灯神觉得借8成去买楼价500万至600万元中细价住宅喺冇乜问题，一般市民又应付到，银行风险可控。

不过如果系问银行借足8成去买一个楼价1500万住宅物业，每月供款将会接近高达5.46万元，即系供款人嘅月入要求高达10.9万元，真系未必一般普罗市民可以夫妇档搞得掂。另外，金管局无下调压力测试要求，即仲要计埋压测+2%嘅要求，咁样计法，每月供款将会增加到6.91万元，咁月入要求又会再多啲，麻烦每月收入要高达11.5万元。

借尽8成买到1500万　月入要达11.5万

放宽按揭后供楼数字大致计算方法如上，灯神计完数都觉得咁样买楼会供得好辛苦，而且仲未计生活上各类型嘅使费，可能屋企有两老要养、子女又要读书、过时过节又出去食餐好、暑假又要全家去旅行。唯有奉劝各位市民“小心计数、唔好心雄”。