价钱战胜一切　3万入飞无惧水泥厂　亲海駅势即日沽清｜楼市灯神

全城瞩目嘅长实（1113）油塘东源街新盘亲海駅II，终于喺今日（12日）早上正式开卖，依个新盘首轮销售收票破尽纪录，仅仅六天就收咗超过3.8万票，打破咗青衣灏景湾1997年7月收票约3万票、尘封咗26年嘅收票纪录。收票数字惊人，灯神相信今次首轮开卖都九成九“一Q清袋”。

虽然亲海駅II低价开盘奏效，收票破尽纪录，但灯神都想提一提一众买家，区内环境暂时依然维持工业区状况，长达400米嘅东源街，目前仍有3间混凝土厂营运中，出入时都有唔少田螺车驶过，各位买家入伙后行出行入都要小心啲。所以灯神奉劝一众买家，唔好只系盲目追求低价入市，真系要谂清楚顶唔顶得顺先签约呀。

东源街长400米拥3间混凝土厂　横跨街头街尾

灯神见亲海駅II收票数目咁惊人，最近特登去咗油塘行一转，虽然临海一带开始转型，有全新住宅屋苑落成，但目前工业区环境依然有待改善。油塘工业区一带早系1998年获城规会改划作综合发展区，不过经历咗漫长嘅25年，长约400米、位处临海嘅东源街，现时依然有3间混凝土厂营运中，分布喺东源街6号、20号及22号，即系横跨街头街尾。

逾10架田螺车泊街、洗街车恒常出动

灯神喺冇戴口罩情况下，亲自行晒整条东源街，的确系食咗唔少灰尘。行过一转，整条街有超过10架田螺车，部分停泊喺街边等候，而喺混凝土厂门口就经常有唔少田螺车出入。另外，由于灰尘太劲，不时都会有洗街车帮手清洁，所以成条街都系湿漉漉。睇怕亲海駅II入伙之后，业主们路过东源街会食唔少沙尘，基本上都要“运路行”。

亲海駅II正门位置正向东源街　田螺车必经之路

可以留意返，亲海駅II正正位于东源街15号，至于亲海駅I则位于东源街8号，两个楼盘位置相当接近东源街6号混凝土厂附近。灯神去完楼盘现场，又再揾揾亲海駅II楼书，睇返楼盘正门出入口，正正面向东源街，所以落成入伙之后，喺3间混凝土厂未迁出嘅情况下，可能一众业主出入时都要戴下口罩挡住沙尘，否则就要硬食田螺车驶过带起嘅沙尘！

2A座、2B座低层向海单位　同时面向东源街

由于东源街3间混凝土厂依然营运中，相信一时三刻都唔会迁走，所以预计面向东源街嘅2A座及2B座低层向海单位，会比较受影响，依方面一众准买家就要留意一下。所以灯神认为，拣选内园泳池景单位，可能会喺一个比较好的选择。

毗邻PENINSULA EAST舖面布满灰尘

事实上，喺2016年11月入伙、位于崇耀街与东源街之间嘅屋苑PENINSULA EAST，基座部份舖位由于长期面向东源街，舖面已经布满灰尘，地下数个舖位亦只有一间茶餐厅承租，其他舖位一律空置。

除咗要留意东源街情况外，灯神认为准买家们都要留意一下，油塘工业区过去多年一直都喺转型当中，多家发展商早就已经插旗，未来油塘湾一带将会有多达超过1万伙单位落成。喺未来海量供应、现时整体楼市滑落情况下，已经出现亲海駅II率先低价开盘，如果未来供应陆续到步，区内楼价可能都会比较波动。

“价钱战胜一切”　卖楼最重要够平

不过今次亲海駅II开价吸引，首4张价单全数626伙，折实平均呎价14,868元，喺2016年后、过去7年市区最平新盘，相信一众买家心态都系“价钱战胜一切”，基本上以上环境因素、未来区内供应情况，此两大考虑都未必可以阻碍到一众买家入市决心，否则就唔会出现收超过3.8万票嘅全新纪录！以目前市况嚟睇，睇嚟发展商要成功卖楼，最重要元素就系要“平！平！平！”。