澳门美食丨老牌茶记新鸿发美食 人均$30+识食要试干炒牛肉通心粉
澳门高士德有间人均$30、$40嘅茶餐厅，开咗廿几年，好多澳门地头蛇都钟意喺度吹水叹世界。
茶记千千万万，新鸿发美食凭乜日日都特别多人，依家就带你嚟睇睇！
纵横江湖廿余载 澳门老牌茶记之光
斑驳嘅地砖墙体，系岁月赋予俾佢嘅勋章。坐落喺三盏灯附近嘅“新鸿发”，一眨眼就陪伴咗澳门人廿几年。可能连老细都谂唔到，呢间略显逼夹嘅店仔，可以走过咁多春秋。
经受住时间同澳门人味蕾嘅考验，时至今日人气依旧，好多街坊街里都会约上老友记一齐嚟吹水。揾一个位置坐低，睇住人来人往，市井气十足。
呢度食嘢嘅选择好多，出餐快兼大件夹抵食，怪不知街坊都钟意嚟。人均$30、$40嘅价钱，为食妹一日可以嚟食五餐！
记低呢啲招牌菜 识食老饕都咁落单
第一次嚟打卡唔知要嗌乜？识食嘅老友记教落咁落单唔踩雷！
1. 干炒牛肉通心粉
干炒牛河就食得多喇，干炒牛通你试过未？数到招牌必点，“新鸿发”门面应该就系呢碟干炒牛通！
呢碟干炒牛通斋睇都觉得佢镬气爆棚，捧上台就闻到一阵香味。分量可以话系相当老实，牛肉劲多，不亏系封神之作！
通粉非常有嚼劲，唔难食出系用生抽炒嘅通粉底。牛肉更是可圈可点，唔单止嫩仲入味，咸香诱人，实属系呢碟炒通粉嘅点睛之笔。
2. 厚多士
呢件厚多士份量一样惊人，目测起码有8cm左右厚！
多士一定要趁热淋上糖浆，一啖咬落去先脆后软，中间夹住花生酱馅搭配糖浆香香甜甜～
虽然厚多士系一个热量炸弹，但系为食妹心甘情愿咁为佢生肉！厚多士妥妥系下午茶嘅经典款，百吃不腻～
3. 菠萝芝士猪扒鸡蛋包
菠萝芝士猪扒鸡蛋包走嘅亦都系浮夸风，足足有四层咁多！用料够晒老实，直程系一份就饱，一口大满足！即点即做，拿到手仲热辣辣！
菠萝包超级酥脆，一摸就掉渣！猪扒嘅厚度恰到好处，油煎过后肉香无处可藏。高温油煎猪扒嘅温度融化芝士。整体口感酥脆厚实、治愈满足。
4. 咖喱角
“新鸿发”除咗有日常茶记嘅粥粉面饭包茶饮，其实仲有好多宝藏糕点添～入门口就可以睇到呢个玻璃橱柜，齐集中外面包糕点！
为食妹最推荐嘅就系8蚊一只嘅咖喱角，唔试下就走宝喇！皮稍为有啲厚，不过胜在够酥脆，唔会觉得滞！入边包住薯蓉，都几绵软下，偏咸香口！
新鸿发美食
地址：澳门花王堂区贾伯乐提督街55号A（三盏灯附近）
营业时间：周一至周五，周日 6:00-18:00，周六 6:30-18:00
电话：+853-28530452
【本文获“食在澳门”授权转载。】