澳门美食经典“葡式辣鱼包”只卖7.5蚊？42年小店第二代传承美味

成日都话“包治百病”，澳门哩间铺仔“根记小食”又真系“医”好咗我无数次。从学生时代嘅医饱肚，变成宜家嘅治愈滋味。

“根记小食”喺澳门开咗40几年，从木屋区走到筷子基，陪一代代澳门人走过青葱岁月，街坊学生哥最爱，7.5澳门币就有著落。👇👇👇

开咗40几年，都唔变？

开喺澳门筷子基美居广场嘅“根记小食”，创立自1980年。起初系开设喺青洲木屋，一双眷侣用心经营著哩间小店。如今根叔太太走咗，店都搬出去筷子基。

墙上几张旧照片，系岁月留低嘅印证。虽然历经咗42年嘅变幻，但系仍然保留住当初𠮶种真挚嘅味道。根叔两个仔时至今日仍然亲力亲为，将哩一份美味传承落去。

“由细食到大，佢都仲系几蚊鸡一个包！”价格亲民嘅根记系青洲学生哥嘅最爱，细细个攞住碎银都可以喺哩度吔只靓包，宜家仍旧可以。

食咗40几年，都唔厌？

经典葡式风味

讲到“根记”，就不得不提佢最经典嘅辣鱼包。哩度嘅辣鱼包采用葡国特色做法，将鲜香惹味嘅湿免治、辣鱼裹喺松软嘅面包之中。

30种丰富搭配

“根记”嘅猪仔包衍生出30多款组合，辣鱼、猪柳、芝士、蛋……自己钟意食乜就嗌乜，一次性可以满足为食妹好多种愿望~

7蚊鸡医饱肚

可以点7.5蚊一个嘅纯辣鱼包，亦可以嗌30+一个嘅全餐包。而20蚊出头就有一个set，哩度可以感受到真真正正嘅“丰俭由人”。

看看“根记小食”各种不同的美食，小编有这些推介👇👇👇

标配版：辣鱼芝士包

第一次嚟试嘅朋友仔可以先点一份“标配版”辣鱼芝士包，简简单单嘅辣鱼再加上一块芝士，12蚊嘅标配组合好适合月底荷包缩水嘅时候顶肚~

辣鱼嘅辣度恰到好处，唔会哽喉，系广东人都可以接受嘅辣度，小小鲜香嘅辣味再加一块奶香浓郁嘅芝士，正到痺~

豪华版：廿二蚊包

而进阶豪华版嘅廿二蚊包就系性价比最高嘅选择，入边有辣鱼、猪柳、芝士同蛋，其中猪柳包同辣鱼包都喺读书时候最受欢迎嚟㗎！

两层肉再加上蛋、芝士，睇落真系好丰富，食落层次感十足~现烘包底、啱啱起镬嘅猪柳蛋的余温足够融化𠮶块芝士，趁热食仲可以食出拉丝！

顶配版：全餐包

而顶配版嘅全餐包就比较适合啱出粮嚟奖励下自己，32蚊一份，辣鱼、猪柳、芝士、蛋、午餐肉、香肠都可以一次过食到，大满足！

劲多料，肉肉多到喺包度漏出嚟~一份就可以喂饱为食妹哩个大胃王，餐包塞到满满，咬落啖啖都系肉嘅爽感，简直无法比拟~

点咗40几年，都唔够？

除咗辣鱼包系列，猪柳蛋治同根记鱼蛋都系澳门人学生时代嘅回忆杀！

猪柳蛋治

以前澳门学生最钟意朝头早排队买一份猪柳蛋治做早餐，咸香猪柳配上滑嫩煎蛋，现烘嘅三文治脆卜卜，食完成个人充满能量，上堂都精神啲！

根记鱼蛋

放学就钟意买碗鱼蛋督住行，秘制咖喱酱更加浓稠、稍带香辣，鱼蛋弹牙有嚼劲，每次食都有一种回到旧时光嘅感觉。

开咗40几年都唔变，食咗40几年都唔厌‍，好似“根记”咁一直坚守亲民初心，代代相传嘅老字号小店越来越少，哩份坚持同情怀，难能可贵。

根记 KANKEI
喺边度食：澳门和乐大马路石仔堆巷美居广场一期O铺
几时有得食：6:30-18:00
揾食电话：+853-28591059

【本文获“食在澳门”授权转载。】