澳门美食｜老字号占西饼店5大必食　最好吃嘅沙翁/核桃马令/鸡批

查实为食妹一早已经俾各位吃货推荐去试下澳门占西饼店嘅沙翁，但系拖延症嘅我一直都未出发。咁啱上个星期city walk去“古董啡室”嘅时候经过，隔远路就闻到烘焙嘅香味，为食妹暗地里已经决定今个星期必须要嚟探一探！

行入门口，姊姊就非常热情咁招呼我哋，问到话呢度开咗几耐，姊姊幽默咁讲到：“哗！仲大过我，起码开咗50几年。”

50几年都坚持手工制作，专注做老式面包西饼。想吃嘅朋友仔一定要趁早到，因为呢度好受街坊欢迎，招牌正嘢一出炉就容易俾抢晒～👇👇👇

运气爆棚，喺未做过任何功课嘅情况下为食妹买到咗今日第一炉沙翁！

沙翁

沙翁真系名不虚传，啱啱出炉仲热辣辣拿到手就俾“香迷糊”了！

一阵浓郁嘅蛋香味扑鼻而来，表面上裹满细砂糖，香香甜甜，非常松软！为食妹真系非常后悔只买咗两个，同摄影师大哥一人一个根本唔够喉～

除咗有沙翁，仲有超老饼嘅忌廉筒、核桃马令、鸡批、拿破仑等等……款式多到数都数唔晒！价格实惠又好味，睇见样样都想试下！

忌廉筒

忌廉筒系为食妹嘅童年回忆杀，已经超耐无食过呢个热量炸弹喇！忌廉筒嘅造型就好似个超大田螺，咬落脆脆甜甜，每啖都好满足！

核桃马令

喺姊姊嘅热爱推介下我哋试咗一个核桃马令，糖霜外壳底下裹著满满嘅核桃糖浆，仲有核桃肉，底下挞皮好香。食落虽然有小小黐牙，对于我嚟讲亦都有啲偏甜，但都系好正啊～～

鸡批

鸡批都非常之受大家欢迎，个批焗得好靓，斋睇住都超有食欲。皮靓馅靓，鸡肉非常嫩滑，咸香诱人，不愧系明星产品！

拿破仑蛋糕

相信无人可以拒绝嚟一旧松松软软嘅拿破仑蛋糕～甜度啱啱好！层次丰富！口感松软！非常推荐大家一试！

占西饼店
地址：澳门下环风顺堂街33号丰明大厦地舖
时间：05:00-20:30
敲黑板划重点：沙翁、核桃马令、鸡批每日中午12点出炉，拿破仑、忌廉筒下昼1点出炉。至于一日出几炉几点出都系视情况而定，想吃嘅朋友仔最好准时到～

【本文获“食在澳门”授权转载。】