澳门手信丨三盏灯晶记饼家53年老字号本地人日日食　纯手工CP值高

澳门的晶记饼家已有50多年历史，代代相传，真材实料，坚持手工制作，装修朴素，包装简单，价格实惠，技艺细腻，承载无数澳门人的旧时回忆。

从红街市到三盏灯，澳门人都认识它

众所周知，为食妹经常都出没喺三盏灯附近觅食。而就喺某日为食妹正同摄影大哥“横扫街头”嘅时候，有两位路过嘅买𩠌阿姨强力推荐我哋去呢间开咗半个世纪嘅饼家。👇👇👇

为食妹过嚟打卡嘅时候系工作日嘅下午， 完全估唔到呢个时间都会有咁多街坊过嚟买饼。听街坊讲呢度开咗50几年，以前铺头系喺红街市，后来搬嚟三盏灯。

嚟呢度买饼嘅都系老街坊，个个都食咗几十年“晶记”嘅饼，每日买𩠌过嚟买翻半磅，放喺屋企送茶当早餐、零食。“晶记”嘅饼，好似已经成为咗佢哋生活中嘅一部分。

铺头绝大部分嘅饼点都系纯手工制作，53年来，“晶记”一直用佢哋嘅坚守住澳门呢一份“人情味”，代代相传生生不息，每一啖都仲系旧阵时嘅好滋味。

专做广式经典饼点，识食街坊买啲乜👇👇👇

光酥饼、加蛋饼、鸡仔饼、老婆饼、老公饼……呢度嘅品种非常齐全，专注做经典传统嘅广式饼点，行到街口已经闻到一阵飘香。系街坊嘅热情“推荐”下，为食妹买咗几只嚟试~

1. 光酥饼

讲到“晶记”，最出名嘅一定系佢嘅光酥饼，街坊话嚟迟咗都买唔到！其实铺头嘅光酥饼有黄糖同白糖两只味，其中黄糖光酥饼系最经典最多人买嘅存在。

“晶记”嘅光酥饼，扎实得嚟又松软，糖香十足。够晒干身，食落“啃颈”先系光酥饼嘅灵魂所在，配翻壶靓茶就非常完美~

除咗黄白光酥饼，老板专登送咗一个“菠萝饼”俾我试下味，查实菠萝饼嘅口感同光酥饼差不多，不过造型比较别致，同埋蛋味比较重，推荐指数五粒星，算得上系“晶记”嘅遗珠！

2. 加蛋饼

最出名系光酥饼，而最受欢迎嘅就系加蛋饼，为食妹系呢度边睇边影个几钟，发现嚟买饼嘅街坊几乎人手半磅加蛋饼~

细细粒嘅蛋饼依然系真材实料，口感非常扎实，食落又几松软，最紧要系蛋味非常香，未食都闻到一阵蛋香味，试咗之后更系忍唔住食完一个又一个！

3. 鸡仔饼

鸡仔饼喺广东家喻户晓，而“晶记”嘅鸡仔饼同样喺澳门家喻户晓。鸡仔饼第一啖酥脆，第二啖烟韧，第三啖甘香。咸中带甜，耐人寻味。

4. 老婆饼&老公饼

老婆饼同老公饼都系街坊嘅推荐，老婆饼老公饼呢两款饼都一样系皮薄馅靓，甜老婆饼、咸老公饼，大家可以根据口味嚟选择~

小众宝藏手信推荐，送礼自留一样得

其实“晶记”除咗做街坊街里最中意嘅饼点之外，仲有好多经典嘅澳门手信，例如杏仁饼、蛋卷凤凰卷、澳门四宝之类，手信嘅种类一样系多到数不胜数。👇👇👇

不过呢度嘅出品都系天然无添加，买翻去要尽快食喔！

一边食一边同老板倾计，了解到嚟帮衬嘅大部分都系港澳居民，嚟买手信嘅顾客会比较少，但其实除咗澳门𠮶几个比较出名嘅牌子，“晶记”都系一个唔错嘅选择。

虽然呢度只有朴素嘅装修，只有简单嘅包装，但系却53年如一日咁坚守住最细腻嘅技艺，最实惠嘅价格，保持住最初嘅味道，送出嘅唔止系一份来自澳门嘅手信，仲系一份来自澳门嘅“人情味”。

晶记饼家
地址：澳门新桥卢九街1号A地下（三盏灯步行100m）
营业时间：07:00-18:30

【本文获“食在澳门”授权转载。】