澳门美食丨雀仔园街市老字号中寻宝　必试肠粉生滚粥云吞捞粗

澳门的雀仔园街市恢复营业啦！
对于资深吃货而言，最最最令人心挂挂嘅，莫过于雀仔园嘅美食。

澳门的美食无数，最贴地嘅美食仲系街市美食！一边同街坊谈天说地，一边大饱口福，食嘅就系呢种人间烟火气。

自从雀仔园开翻之后， 好多街坊同熟客仔都表示佢哋系专登过嚟“寻味”。佢哋话始终都系觉得街市抵食就脚，大家食咗几十年，又啱嘴型可以吹下水。

目前呢边恢复运营嘅餐饮档口唔算多，但全部都系经典老字号。好多老细事头婆都上咗年纪，纷纷表示再做多几年就退休叹人世，食少见少啦，快啲紧跟为食妹嘅脚步嚟逐间攻略~

1. 志图粥面

志图最出名嘅就系布拉肠同生滚粥，必须都点上一份！

宜家布拉肠都唔多见啦，今日就来找回童年嘅味道。肠粉讲唔上话好薄皮，胜在米浆都系老板自己每日现磨，食得出米香味，有布拉肠特有的韧性。

生滚艇仔粥更系可圈可点，粥滚到又绵又滑。海量的配料，再加上一把锦上添花的花生，每一羹都鲜到入心入肺。

2. 成记肠粉

而隔离嘅成记食嘅又系另外一种肠粉，主营自家手工制肠粉、各式糕点、豆粽。

而必食嘅就系烧卖肠，一份细烧卖肠有两粒大大旧鱼蓉烧卖，皮够晒薄肉又够大，好多街坊都会点一份斋烧卖食个够！而肠粉都好滑，赞赞赞！

无敌碳水组合必须要加多一只粽，呢度嘅粽系绿豆肥猪肉粽，一啖咬落去可以食到满满嘅绿豆蓉，肥猪肉嘅比例唔会太多，为食妹超爱！

3. 陈记美食

陈记美食就专门做各种粉面，雀仔园嘅人气王非佢莫属，一到饭点就要同各位公公婆婆一齐排队等出餐。

识食就一定要试下佢哋嘅云吞捞粗加腩汁，云吞皮薄到一夹就穿，真系皮薄馅靓。腩汁咸香惹味，捞粗简直一流~

4. 成记糖水

为食妹一直都好好奇成记肠粉同成记糖水有咩渊源，原来佢哋唔系同一家人，但系系街坊+好朋友嘅关系，大家都系第二代传人，由细玩到大~

温馨提示一下大家，成记糖水大概会系12:30-13:00之间开档。其它档口一般都系做早市，而佢哋系做下午，过嚟觅食记得要睇准时间，千奇唔好摸门钉呀。

糖水嘅均价一般15蚊上下，选择都几多下。为食妹试咗腐竹薏米同陈皮绿豆沙都觉得唔错，煲得够滑又足料，唔会太甜~

5. 隆记

隆记主要系饮嘢都食包、多士之类为主，简简单单点杯嘢饮，点个包食，系呢度叹下下午茶，都几惬意。

除咗雀仔园街市嘅美食街，呢度附近仲有好多有情怀嘅老店，值得探寻我哋慢慢探寻，呢度老字号保留的不只是𠮶份味道，更是那份埋藏在深处嘅回忆。

雀仔园街市
地址：澳门公局市前地11号

【本文获“食在澳门”授权转载。】