中原美联世纪大和解？合作开新舖叫中联？　真相原来系...｜灯神

临近年底地产代理界特别多花边新闻，本地两大龙头地产代理中原及美联，喺11月卷入合谋定价事件，双方关系似乎跌到去冰点，大家就算断绝来往亦相当合理。不过灯神最近收到消息通知，佢话两间大行竟然破冰兼合作开新公司！新公司名仲叫做“中联地产物业”，话要结合两间大行的优点，真系令人震惊。

但灯神认真了解过，原来呢间新公司“中联地产物业”，同两大龙头代理行并无关系，纯粹因为其中一位老板都曾经在中原及美联任职过，所以先用呢个名！不过中原施生似乎有啲担心，佢仲话早几日已经收到同事通知呢间代理行有啲似中原，担心部份客户会唔小心去错舖头，所以中原法律部都了解紧有冇嘢要跟进。

临近年底个个打工仔都想收炉，唔少地产代理朋友早排发力冲完热卖新盘后，都开始休息并为下一年作新部署。有位老友代理就同灯神讲，最近见到有新力军加入地产代理行业，不过间公司就好有趣，叫做中联地产物业有限公司（CENTERLAND PROPERTY LIMITED），同本地龙头大行中原集团（CENTALINE PROPERTY），英文名睇落就有几分相似。

网站简介“中是中原　联是美联　结合香港两间龙头公司的优点”

灯神睇返佢地网页资料，原来呢间新晋地产代理舖相当有远见，目标系要做到两大龙头代理中原及美联的水平，佢地公司简介仲写明“中是中原　联是美联　结合香港两间龙头公司的优点！就是中联！”睇嚟呢间细A相当有理想。

近年楼市一潭死水，日日净系听到蚀让个案，见到地产界有新活力，灯神都觉得好兴奋，所以立即打去问下呢间新晋细A代理行，点解喺楼市下行时加入行业内，而且仲话要结合两家本港龙头代理行的优点，个名仲要结合两家公司的元素。

负责人：冇刻意模仿行家　解画自己曾做过中原、美联

呢间中联地产物业嘅负责人王小姐就回复灯神，佢话间公司系新成立无耐，由于佢系过去几年都曾经任职中原同美联，所以公司名就叫做“中联”，当然都希望做到好似两家龙头代理行咁高水平。不过有啲外界代理就话佢地公司名所拣选的鲜红色，以及英文名都好似中原，呢位负责人就大喊冤枉，直言“佢地冇刻意模仿其他行家”，纯粹因为自己曾经做过两边大行，先会在网站上写上“结合香港两间龙头公司的优点！”的豪言。

呢一间新晋细A专营东涌、葵涌一带物业买卖租务，灯神喺网上搜寻过，呢位王小姐过去的确在东涌区两家地产代理任职过，睇嚟佢的确好欣赏两家旧公司，所以自己做老板开新公司都要致敬一下。

施永青：早几日已收到通知　法律部会了解情况

不过欣赏还欣赏，商业机构LOGO太过相似可能都会引起误会，灯神就胆粗粗问下中原创办人施永青，施生就话佢都收到同事通知，呢间新晋代理行有啲似中原。

施生佢就话“其实佢个名就冇问题，以前深圳都有地产舖叫做中联，后来就被内地另一家大行收购咗”，不过呢间公司所用的颜色及字体就几似佢地中原，所以过去几日已经揾咗公司法律部了解中。施生仲话，因为都担心啲客会去咗舖头，所以法律部都会了解一下会否有侵权，以保障返自己公司利益。