楼市减辣无用、代理生意难做！　直击代理舖变淘宝自提点｜灯神

今年楼市交投相当惨淡，一众要靠佣金生存的地产代理，近几个月都活在水深火热之中，11月份更有数字显示，当月每11名代理先争到一张单，情况相当严峻。喺生存空间不断收窄情况下，地产代理自然要谂计保住饭碗，灯神最近喺社交媒体睇到大角咀有间地产代理舖，竟然将部份舖位变为“淘宝自提点”，见到此情况灯神亦感到心酸，所以特登去过咗现场望一望。

原来间舖就位于大角咀港湾豪庭商场内，该舖头外貌与一般地产代理并无大分别，招牌鲜艳，舖面贴上多个楼盘广告，除咗本地楼盘外，而且仲有大湾区精选。不过舖面另一边就大字标题贴上“自提点”三只大字，而系舖头外面望入去，更加见到有为数不少的货架。

半间舖头放置1.8米高货架　多个包裹待领取

灯神见到如此状况，真系忍唔住走入去舖头内睇下，一入门口就畀佢吓亲，一间地产舖竟然有大约一半空间拎嚟做自提点，舖位中心竟然有多个高1.8米的货架，仲有唔少包裹等待领取。

店内地产舖招牌做得四四正正，不过下方长柜除咗放置文件架，竟然都拎埋放置包裹。好地地一间地产代理舖，竟然变咗间自提点，真系令人意想不到。灯神怀住好奇心就问下舖头内的职员，不过佢就话知道最近一周舖头变得好出名，但自己只系普通职员，唔太知道点解要将舖头部份空间用成自提点，所以唔太方便评论。

职员：减辣对香港人冇吸引力

但系佢就话“近年生意差、成交量少、睇楼客亦都一样，本身舖头都有其他分店，但依家缩到净返一间分行”。佢仲话，虽然政府10月底系有为楼市减辣，不过其实根本冇乜效用，对香港人冇乜吸引力，二手交投真系冇乜点升，就算买第二套房的税率由15%大减一半到7.5%，一班投资者都系唔肯入市，反映咗成个市况、成个环境唔系咁好啰。

近月11名代理争一张单　情况严峻

其实地产代理行业生存空间的确不断收窄，灯神睇返啲数字，11月份整体物业注册宗数有3,526宗，但全港有多达39,747人从事地产代理，者系平均每11.3名代理争一张单，虽然较10月份每13.7名代理争一张单比较，竞争程度稍为减少，但依然处于严峻情况。因此为求生计，都好难怪地产代理都要捞多一范做埋自提点。

临近圣诞、农历新年消费档期　迟早堆满舖头

除咗楼市冇成交令到地产代理要捞埋自提点外，灯神认为临圣诞节、农历新年亦系重要因素，始终两大节日都系消费旺季，相信到时会有大批货品运送到依间另类自提点，睇怕过多几个星期，间舖头应该就会堆满包裹，到时睇怕都好难带客入舖头签约了。