澳门永耀咖啡室｜古董啡室叹瓦煲咖啡瓷壶奶茶　老板80多岁不言休

一开就系60年！澳门宝藏“文物级咖啡室”，只有本地人先知！

冇环境、冇冷气、冇营销，点解“永耀咖啡室”呢间“三无”咖啡室开咗五六十年都咁受欢迎？

近期好兴“city walk”，先排为食妹喺亚婆井附近例行扫街，一眼就俾哩间超级old school嘅咖啡室吸引住，是必要分享俾大家！无论系门面定店面都充满住岁月嘅痕迹，老细系一位80几岁亲切公公耀哥，摄影师哥哥表示今日饮到咖啡界OG冲嘅啡真系佢嘅荣幸～

按图看看永耀咖啡室经岁月洗擦而来的痕迹👇👇👇

同耀哥嘅交谈中我哋得悉，“永耀咖啡室”已经开咗五六十年有多了，一开始旧档喺河边新街，后来搬过嚟风顺堂街都有三十几年了，有网友称之为“文物级啡室”真系非常贴切。

为食妹入座之后铺头就陆陆续续坐满晒熟客仔，有公公婆婆过嚟饮嘢吹水，亦都有同我哋一样嘅后生细仔过嚟聚头。大家坐低就问点解最近咁少见到老板娘，耀哥笑言老板娘退休享清福，但系佢都会坚持做到做唔郁为止。

除咗店面够老派，嘢饮嘢食都好老派。老派嘅人做老派嘅事，呢度依然坚持保留住昔日嘅澳门风味。

️电烧瓦煲奶啡

瓦煲咖啡系呢度最引以为傲嘅招牌，曾经系真正嘅“炭烧”，但系随著时间嘅变迁，耀哥亲手将“炭”画走改成“电”。

呢度嘅咖啡口味偏淡，但系口感非常嫩滑。就连咖啡杯都充满著“沧桑感”，真系一啖时光倒流。

按图看看️少见的电烧瓦煲奶啡和瓷壶冲焗奶茶👇👇👇

瓷壶冲焗奶茶

瓷壶冲焗奶茶都一定要试下，真系好耐无见过咁老式嘅制法。奶同茶嘅比例可以按照你自己嘅喜好进行调配，自斟自饮。

或者呢啲老店嘅环境、味道都唔算得上出色，但佢可以带我哋寻回𠮶啲随时间流逝咗嘅岁月。可以感受到老一辈做事嘅踏实，几十年如一日捍卫著自己嘅热爱同坚持，值得我哋学习同尊重。

澳门永远需要这些充满人情味的老字号。

永耀咖啡室
地址：澳门西湾风顺堂街14B，邻近圣老楞佐堂（风顺堂）
揾食时间：07:30-11:00，15:00-18:00（如果冇客会提前收档）

【本文获“食在澳门”授权转载。】