【无法成为野兽的我们】你不是职场清道夫，唔需要乜都帮人执！
打工仔每日返工都有一个愿望，就系“准时放工”，很可惜呢个愿望一年都实现唔到十次。无尽的OT，有时系因为队友太猪、有时系老板或客户唔断气，不过，谂深一层，OT真系唔系你自己造成？
作者：诗宁
香港有唔少办公室都存在一样既无聊又讨厌嘅潜规则——准时放工等于懒，呢个潜规则令好多人明明无嘢做都唔走，但令更多人搞到自己好多嘢做走唔到。承认吧，香港人你已习惯忙，内心好怕其他人觉得你唔忙，好惊畀人讲闲话，话你系冗员、唔尽责、无团队精神……慢慢地，你乜都揽上身，继而变成职场清道夫，有乜屎都系你执。
延伸阅读：
【施政报告】延长产假14星期足够？Netflix放足一年冠绝全球？
瑞典人生活哲学“Lagom”：从不OT，与恋人一起享受的刚刚好生活
你唔系清道夫，唔需要乜都帮人执！
举个例，Senior恰Junior事件每日都发生，最普遍嘅系，明明个工作系Senior负责，但“出于好心”而“教”Junior去做Senior嘅嘢，你估Junior唔知自己畀人恰紧咩？知，但唔敢反抗，加上好多人同Junior讲：
“后生仔女，出嚟做嘢唔好怕蚀底，做多啲学多啲。”
“揾得你帮，证明你有能力，帮到就帮啦。”
众人催眠Junior嘅同时，Junior亦催眠紧自己，“做啦做啦，学多啲，到升咗职咪可以点返人做嘢啰。”你以为啦，“点人做嘢”系一项技能，首要厚面皮，次要无良心，你系咪做到先？大把人升咗做Senior之后继续乜都揽上身，只有更忙更多OT。
恰你嘅人系衰，但你都唔见得对自己好。
别因怕自己没价值而疯狂OT
职场清道夫千万个说法令到自己好忙，说穿了其实怕别人觉得自己无价值，为咗讨好别人，搞到自己好夜先返屋企、平时公司有麻烦嘢都系揾你顶……恰你嘅人系衰，但你都唔见得对自己好。
“呢单嘢唔关我事”呢句说话可以用嚟卸膊，但同时可以用嚟保护自己。有啲衰人做嘢做到一半，出事之后讲呢句说话将乱摊子屈落其他人身上当然系唔啱，但如果单嘢坚系唔关你事嘅话，你又何必扑出嚟帮人执手尾？一间公司每日都有大大小小嘅乱子，你又帮得几多次？有啲嘢唔关你事，就大大声答真系唔关你事，其他人点睇，重要咩？