日日呕血、经常要全组人陪佢补镬？一招K.O.应对“缩骨猪上司”！

从来，返工之所以痛苦并唔系因为要做嘢，而系因为要对住“某啲人”，“某啲人”可能系朝令夕改嘅老板、蛮不讲理嘅客户、做咩都甩漏嘅同事，重复又重复咁同佢哋冲突与磨合真系令人好疲惫，但原来咁都未系最惨，更无奈系遇到本身已经唔醒都仲要“缩骨”嘅上司，真系日日呕十九几两血。

Christy出社会做事已经十几年，个人唔系咁醒目、成日做错事，日日都比上司闹：

“你做咗几多年嘢呀，点解你仲可以犯低级错误，A客户嘅资料Send错比B客户？”
“我今朝已经同你讲咗三次话个背景要用红色，点解你仲系比个蓝色背景我？”

无论件事系几简单、几基本，Christy都会做错，而且经常要全组人陪佢一齐补镬，甚至好多时要刚毕业嘅新同事教返佢转头。但系，Christy有个“优点”，就系胜在无胆，唔敢驳咀、唔敢改变、唔敢辞职，虽然佢成日比人闹，但喺公司坐咗好多年，坐坐吓终于轮到佢做Manager，从此，佢对条Team嘅破坏力就更强。

一升职就露底　唯有缩骨博甩身

虽知道，职位低嘅时候，只要听话就可以安稳，乖乖地跟从上司指示，有咩事就讲一句：“系经理叫我咁做嘅”，然后就可以将责任甩开，继续返埋位工作。但升职之后，除咗人工加啲啲之外，责任同工作量都会海量地增加，如果一个人升职前系无用脑嘅习惯，升职之后个脑系唔会突然转快咗嘅。

如果一个人升职前系无用脑嘅习惯，升职之后个脑系唔会突然转快咗嘅。

当部门有个缩骨经理，下场系点？最快见效就系离职潮，走得快未必好世界，但走得慢就日日踩屎食死猫，缩骨经理叫你行左，你明知左边有屎，问佢可唔可以行右，佢话唔得，你唯有跟指示行左，结果真系踩屎，问返经理：“点算呀？对鞋污糟咗。”经理缩一缩答：“我唔知㖞，对鞋系你嘅，你自己抹返干净啰。如果你一早行右边就无事啦。”呢个时候你就只能含泪抹屎鞋。

跟著呢类上司，点样可以安全？除咗辞职之外，就系遇到咩事都唔好问佢意见，你自己决定，但当然你要有信心，确保自己唔会犯不可原谅嘅错误，咁就可以完全跳过佢，当佢无到。

你会问：“真系可以跳过佢？佢系上司㖞！”可以，因为上文提过，呢类上司唯一“优点”系无胆，佢唔敢辞职而纯粹因年资而升上去，同样，佢都唔敢乱炒人，因为佢内心知道，自己无能力教新人，缩骨猪上司绝对需要留住旧人以确保有人帮佢补镬，加上旧人识自动波，知道每日要做啲乜，你叫佢教新人？佢自己都唔知自己每日做紧乜，点教呀？