【蠢是原罪？】同事讲又唔明、闹又驳咀！令人每朝想请假罪魁祸首
好同事可以发展成好朋友，但衰同事嘅影响力更大，可以令你日日返工都充满负能量、每晚都唔想天光、每朝都想Sick Leave、返到公司全日都黑口黑面反白眼。我之前写过好多文关于应对唔同类型衰同事嘅方法，缩骨、屈人、偷懒……咩都有得搞，但有一种同事系令人充满矛盾同挣扎，佢不断挑战你嘅忍耐力，但你又唔忍心闹佢，有时唔小心发咗佢脾气，会令你好内疚。呢种人就系——无恶意但非常蠢嘅同事。
作者：诗宁
曾几何时，我都好有同情心
曾经遇过一位勤力同事叫Patricia，正式上班时间系九点，但Patricia每日八点就喺公司，因为佢话想九点前睇晒啲Email，同埋多啲时间准备九点半个例会。有时我唔觉意早咗返工，八点半左右食完早餐，谂住揾Patricia吹下水等九点先开工，佢都系一边做嘢一边倾，手同眼都唔会停。
明明佢系一个尽责嘅员工，而且已经系Manager，但每日都会畀老板闹，系毫不留情咁大声呼喝：
“你究竟有无脑？”
“点解你成日都要将简单事情复杂化？”
由于我同Patricia唔同Team，好少合作，每日见佢咁大个人要好似小学生咁企喺度畀人闹，觉得佢好可怜，成日想叫佢啲老板／Teammates唔好对佢咁残忍。
别人10分钟完成的事，蠢同事需要......
直到有一次，佢话要寄20本年报去北京，但Admin唔肯帮手，而咁啱我路过，Patricia就问我可唔可以帮佢手将20本年报搬落纸箱，我心谂，举手之劳：“OK呀，我帮你手搬吖。个纸箱呢？”
点知咁就出事，正常人“揾纸箱、放年报入箱、封箱”，十分钟内咩都搞掂啦。但Patricia竟然话要揾十个纸箱做比较，逐一用软尺度下Size，要好准确咁揾出最适合放年报嘅箱，放好之后要确保无空位，即使有少少空位都要落街买报纸再搓成一旧旧塞落去，但又要控制个重量，因为太重会比Admin闹……
我听到一半终于明佢点解要咁早返公司，因为佢做嘢一定系好慢，结果我陪佢玩咗20分钟，佢都仲未揾到“世上最适合放年报的纸皮箱”，仲要同我讲一大堆人类听唔明嘅逻辑，啊！我忍唔住向佢发炮了。
呢种同事纯粹蠢，却足够害到你周身蚁
当我发脾气闹佢嘅时候，我好理解佢老板点解日日都不留情面咁闹佢，因为当你好忙，仲要对住一个完全零沟通能力嘅人真系好难有耐性，你讲东佢答西，你问佢食咗饭未，佢就答你电视台套新剧好好睇……我相信佢老板每日都好头痛唔知可以畀咩佢做，无论件事深定浅，Patricia都有足够能力为所有同事增添麻烦。
但当我冷静返之后，就觉得自己好残忍，呢个世界无人想自己蠢或者系同世界接唔到轨，Patricia身为Manager，为咗纸皮箱嘅Size而畀我闹，我谂佢都好唔开心，结果我内疚咗一晚，第二日返工谂住向佢释出善意，点知佢又再九唔搭八，佢啲Teammates听住我哋对话都反晒白眼，相信佢哋每日都畀Patricia搞到徘徊于爆炸同内疚之间。
呢种同事纯粹蠢，佢唔系有心害你，但单单因为蠢就足够害到你周身蚁，对住佢哋真系嬲又晒气，笑又笑唔出，只能无奈。
（文章纯属作者意见，不代表香港01立场。）.