【职场残酷真相】能者多劳“冇多得”！对工作愈认真，愈易辞职？

你上一次辞职嘅原因系乜嘢？离开一个工作岗位，人人都有不同故事。如果简单将辞职原因分两种，就系“开心辞职”同“唔开心辞职”，前者包括：谋到高就、结婚生仔、中六合彩等等；后者包括：同上司／同事唔夹、工作量同薪金不符、看不到前景之类，但其中一个“最唔抵”嘅辞职原因就系：太认真。作者：诗宁

会因为“太认真”而辞职的人，通常都系为人勤力、上心，交个Project到佢手，佢就会尽善尽美，但个世界又边有完美？要完成一件事，好多时都要同人合作，同供应商合作、同同事合作、仲要比上司同客户审批，当中少不免遇到阻滞，愈认真，愈激心；愈激心；愈灰心，结果辞职。

愈认真，愈激心；愈激心；愈灰心，结果辞职。

一心为公司，反而激亲自己

Jennifer系一个认真做事嘅员工，要帮公司筹办一个大型步行筹款活动，呢啲活动通常都系“扣除成本以外全数拨捐乜乜乜”，即系成本愈低，捐款愈高，受惠人士亦愈多。Jennifer认真地希望件事唔系得个做字，想真系帮到多啲人，所以努力控制成本，例如揾人设计宣传物品时，Jennifer会货比三家，揾唔同供应商格价，仲整个表，列清楚每间供应商嘅优点同缺点。点知佢上司Christy一早已决定益自己朋友，内定揾一间贵啲又质素差啲嘅production house，Jennifer除咗嬲自己嘅心机被浪费之外，更加嬲Christy无为件事好、无认真降低成本。

认真做事，得唔到认同，仲要因为啲无聊原因，例如上司个人喜好而被推翻心机，长此下去自然愈来愈无灰心，无动力继续做好，睇见自己愈来愈颓，慢慢就会辞职。

能者多劳，但多劳并无多得

无论公司派几多工作比Jennifer做，佢都可以好有条理地将工作喺deadline前完成，相反，佢身边啲同事就将啲工作一拖再拖，所以每次全team开会汇报工作进度，上司问：“大家讲下手头上做紧乜嘢？”同事们都可以讲一堆未完成、跟进中的工作，而Jennifer呢？就数出一堆“已完成”的工作。

呢个世界无咁多精明同公平嘅上司，所以每次上司听到Jennifer“无嘢做”，只会比更多新嘢佢做，结果同事一个月做五单project，Jennifer就一个月做十单。人心肉做，Jennifer内心当然不忿，虽然佢都知做慢啲著数啲，但作为一个“太认真”嘅人，要佢降低自己工作能力同速度唔系咁易，结果就只能屈埋屈埋自己激心。

作为一个“太认真”嘅人，要佢降低自己工作能力同速度唔系咁易，结果就只能屈埋屈埋自己激心。

好多人会话：“做好自己咪得啰，唔使同人比较。”讲就易，又有几多人做到？大家都出同一份粮、AL日数又一样，但自己就比其他人做得多，人工唔加，上司亦唔会赞多一句，死做烂做，无回报亦见唔到改善空间，点会唔萌生去意丫。

有时做到好灰心，不妨提下自己，系咪自己太认真？放松啲，条路易行啲。