【职场女生最易犯的错】别过份卑躬屈膝！可以礼让，但绝不忍让！

唔知边个祖宗传落嚟，教啲打工仔做嘢要事事忍让，只要你唔系高层，就出少句声，有咩死猫黑镬都要硬食。我同意“受人钱财替人消灾”，部份人打工成日呱呱嘈咩都投诉真系好烦，但有时遇到嘅事太过份或者老板嘅要求已经超出工作范围，仲系咪要忍？

撰文：诗宁

无论你做咩工作，其实返工都系简单分成两样嘢：“做事”同“做人”，做事就睇你学历、经验、能力，无咩好争议，但做人就难好多了，当你想哄人开心，好易俾人话你系擦鞋仔／女；相反你想忠于自己，就比人话系黑面神。往往令你唉声叹气地放工嘅原因，就系个岗位或者件工作令你“唔知点做人”。

可以“礼让”，但不要“忍让”

咁究竟，喺职场上遇到不公、委屈嘅时候应唔应该出声？首先要分清楚“礼让”同“忍让”。做人有礼貌系正常，我教仔都会教佢讲“多谢”、“唔该”，万一做错事要向人道歉，工作上亦一样，大家一齐做嘢要互相尊重。但如果，个“尊重”并唔系“互相”，而一直只系得你去让人，而对方步步进逼，咁仲系咪忍落去？我就唔会教个仔做缩头龟喇。

做过N份工，遇过乱发脾气、善变的老板，或者系缩骨、不负责任的同事，初出茅庐𠮶时唔敢反抗，结果系点？自己收埋唔开心、走入厕所喊、失眠、日日都唔想返工，工作表现亦跟心情一齐差落去。所以死忍烂忍，唔止对件事无帮助，对身体同精神都系伤害。

打工要识刚柔并重

明明，根本就无需要卑躬屈膝地打工，公司同雇员之间系各取所需，公司并唔系送钱比你使，而系买你才能和时间，所以个关系系平等的。要硬净，先无人敢塞死猫俾你；但同时要圆滑，先有人比机会你。而唔系一味自己谷住度气，长此落去乜嘢补品护肤品都救你唔到。

职场上要做到知所进退，说易行难，你自己用心做都总有小人出嚟阻住你上，咁究竟几时进攻几时防守？首先要问下自己底线喺边，例如：“我可以容忍同事偷懒，我做埋佢𠮶份。”、“我可以接受老板唔讲道理揾人出气。”…….“但我接受唔到人哋抢我功劳”、“我不能同懒醒嘅猪队友工作。”

返工系......一啖砂糖一百啖屎​！

返工可能系一啖砂糖一百啖屎，简单啲讲，食屎系无可避免的，所以要清楚自己有咩屎系放得入口然后放工当无事发生开心生活，又有咩屎系一定食唔落？咁就要企硬，无论咩人迫你都唔好接受！同时要记得点样先食得到𠮶一啖砂糖？对你嚟讲乜嘢先系砂糖？出粮？二十日年假？追求理想定兴趣？

有时返工唔开心，系因为比太多屎堆住，堆到忘记咗自己系为“砂糖”而入呢间公司，亦为咗处理啲屎而忘记咗行去更多“砂糖”𠮶边。所以保持清醒好重要，不妨将自己入公司嘅初衷写低，贴喺个位度，唔想太多八卦同事见到嘅话，可以贴喺柜入面或者键盘边。七、八月无乜红日，又系打工仔负能量上升嘅高峰期，快啲揾返条底线出嚟，唔好任人鱼肉呀！