小心变成职场犯众憎：成日呻想辞职，但又唔敢辞职原因是......
经常收到读者Inbox向我讲述佢哋公司情况，然后问：“辞唔辞职好？”其实问得呢条问题嘅人，都已经系想辞职。人人返工都辛苦，有啲人一话辞职就即刻好洒脱交信，又有啲人讲咗几年“我想辞职”都仲系得个“想”字，明明做得唔开心都继续留低，究竟系唔敢走？唔想走？定无能力走？
作者：诗宁
成日呻辞职同事，你我身边总有一个？
身边总有啲同事开口埋口都系：“唉，辞职啦，仲留喺度做咩呀？”、“我考虑紧递信架喇，搞埋呢个Project就摊牌，好头好尾啦。”、“走喇，我拎埋份Bonus就走。”，结果，阿同事拎咗五年Bonus都仲未辞职，仲喺公司咦咦哦哦紧。我好鄙视呢类唔敢离开但又要嘈嘅同事，特别系年轻、无家庭负担𠮶批。
曾经返过一份工，某上司Christy出名变态，好钟意闹班下属，无论下属做咩都闹，夸张到个下属咁啱喺Christy心情唔好时经过佢房门口都被闹。而且Christy好钟意擦佢老板鞋，成日都应承老板一啲不可能任务，然后逼班下属一齐硬食，例如，两条team同老板开会；
老板问：“个艺术展嘅宣传费用要几多？几耐可以完成？”
隔离Team答：“二十万宣传费，大约一个月搞掂。”
Christy谂都唔谂纯粹为咗赢：“我好有信心，我哋Team用十五万，三星期就够。”
老板听到当然好高兴咁决定将个task交俾Christy Team，但Christy班下属就怨声载道。做得好，领功的是上司；做得唔好，被插的是自己。
因此，Christy Team流失率好高，唯独有一个后生女Jennifer日复日，年复年，日怨夜怨都仲未辞职。
我问过Jennifer点解唔走，头一年佢话自己经验未够，惊出去无公司请，又唔想整花CV，想做够一年学多啲嘢先。听落都几有道理，所以我间中都会借只耳仔比佢呻下。
一年后，Jennifer口头禅继续系：“好想走呀，个Christy痴线架……”
但当我问：“咁点解你唔走呀？”
Jennifer：“走得去边吖，出面咪又系衰，度度都唔好架啦。”搞笑，未出过去就已经觉得周围都系咁？到佢再呻，我已经唔想理佢，又要留低，但又唔谂办法解决面对紧嘅问题，得个呻字有咩用？
唔系话一有小小唔开心就要辞职，但唔敢走、唔敢反抗就唔好呻，廿岁唔敢变，呻呻下好快四十岁，然后就变成你好憎𠮶个Old seafood。
我鄙视，想走又“唔敢走”的人......
我鄙视的“唔敢走”同事，系针对无经济负担𠮶种。人大咗，开始见到好多密密硬食，忍辱负重嘅父母级同事，佢哋遇到死猫吞咗就算，即使比公司明恰明剥削，都唔会呻半句，因为佢哋知道自己生命个重心系家庭，亦清楚自己为咩而挨，这是值得尊重的。
所以，“辞唔辞职”唔系一个问题，问题系你知唔知自己为咩返工？点先会开心？