【见工必胜】不要做求职者，只做应征者！被压价应该企硬有原因？

当读者透过面书问我见工问题，我多数都会尽快答，因为我知道好多人都好怕见工，觉得似考试。而其实你只要谂通一点，就唔会再惊见工——“你未入间公司就已经要做下靶，入咗去你仲有人生？”所以大家要学做“应征者”，而唔好做“求职者”。

作者：诗宁

求职者同应征者的分别

求职者：字面就已经输咗，心态系“求”一个职位返嚟。

应征者：公司“征”人在先，你觉得自己系合适人选而去见面。

打一份工，你需要公司畀你嘅钱，公司同时需要你嘅才能同时间，属等价交换，公司并唔系派钱畀你，佢系喺你身上买嘢，咁点解你要“求”佢畀个职位你？入到去仲要受苦、受气、OT……点解要“求”人哋去虐待你？

你上得网睇我呢篇文，我假设你唔系穷到冇钱开饭仲要养一家十九口，咁即系有条件慢慢拣工；唔敢拣，除咗懒就系冇自信，懒就抵你怨天尤人，自信可以慢慢建立。

见工其实系睇下自己喺市场上有咩选择，而唔系去受辱或者被人挑剔，所以唔单只唔使“求”佢请你，遇到令人躁底的要求，你可以反问返佢点解咁奇怪，甚至系拒绝。

常见的躁底要求包括：

１）同一职位，要应征者分三、四次上去Interview

我都曾经做过HR，有次我提议HR Manager同请人个部门阿头夹时间一齐见个应征者，点知个部门阿头话唔好，因为佢觉得个应征者最少肯分两次上嚟先叫有诚意，呢啲谂法真系自私又无聊，大家都系打工仔，明白请假见工有几难，要人为咗你份工请完一日又一日，仲要未必聘请佢，纯粹浪费双方时间。而且，请人返嚟做嘢，又唔系拣女婿，讲能力、经验同态度就够啦，讲咩诚意啫？

２）约好见工时间，个面试官迟到超过三十分钟而无合理解释

有啲老板未请人就已经扮上靶，觉得对方准时而自己迟到先叫有型有地位，其实系冇礼貌咋。如果觉得自己个职位咁多人抢，不如唔好约时间，玩派筹吖？你估有无人排队？

３）要求你准备定一份Project Proposal/Presentation去见工

试过几份工，HR send email嚟话要做定一份proposal（建议书）拎埋去见工，我一睇就覆佢唔去，未出粮就想人帮你公司做嘢，傻的吗？买idea系要畀钱㗎。

４）明明喺CV写清楚Expected Salary，Interview都系要压你价

Send CV比HR𠮶时明明写清楚人工要两万定三万，间公司理应睇咗觉得畀得起先叫人去见工。好啦，见完觉得个人适合，偏偏又话人工唔适合，唔适合你又叫我嚟？系都要将$25,000压到$24,000先开心，除非我真系好好好好好钟意间公司，否则我通常都企硬唔减。𠵱家系你想买，又唔系我想速销，我做乜要减价？