网友热议10大香港街头美食 港人日食375万粒鱼蛋只第3 冠军竟是?
香港被誉为小食天堂，到底边样系必食？即讲香港一样小食，你会谂咩？
香港街头小食出晒名又平、又好味，仲要种类多，唔知食咩好，“扫街”都系一个唔错嘅选择！根据早年调查指出，香港人平均一日就食大约375万粒嘅鱼蛋，认真夸张！今日就等互联网温度计用互联网大数据话你知，香港人最钟意食嘅街头平民小食系边十个啦！
香港必吃街头美食Top 10（按图看清👇👇👇）
DV小教室：《互联网温度计DailyView》透过《KEYPO大数据关键引擎》观测、爬梳港澳地区2万个公开网站频道，包括新闻媒体、各大Social Media、Forum以及Blog，从中取得资料样本数，并以AI语意程式作数据分析。“互联网热度”为主题项目相关的互联网Posts和Comments ，数值愈大代表项目的讨论度愈高。
NO.10 菠萝包
菠萝包冇菠萝，但有脆脆嘅外层，新鲜出炉配埋奶茶咁食，绝对系三点三下午茶嘅必食之选！菠萝包后来更发展新食法，将一块冻牛油夹系热辣辣嘅菠萝包中间，冰火二重奏冲击舌尖上嘅味蕾，口感对比劲强劲，除咗成为香港人嘅宠儿，更被外国游客评为访港必食，都算系扬威国际㗎！不过食菠萝包𠮶阵成日跌晒啲碎碎，建议第一次拍拖唔好食菠萝包啦～
网民：“买菠萝包返屋企食，煎只蛋夹入去仲好味！”
NO.9 鸡蛋仔
50年代嘅香港生活条件唔太好，而鸡蛋仔正正源自于唔想浪费鸡蛋被发明，到今时今日成为家喻户晓嘅平民小食。最令香港人爱不释手嘅原因系外脆内软、烟烟韧韧嘅口感！时至今日坊间更研发咗唔同嘅新口味，例如系朱古力、抹茶等，仲会有鸡蛋仔会夹埋花生碎、香蕉同雪糕一齐，不过以前一底只系$7蚊，依家加埋呢啲新组合，冇$70应该走唔甩！
网民：“以前就系平民小食，依家同出街食个饭差唔多！”
NO.8 肠粉
香港人心目中有两种肠粉，一种系茶楼嘅布拉肠粉，而今日讲嘅系另一种街头小食肠粉，一定系圆柱体，口感烟韧，识食一定要混酱食嘅肠粉！无论系早、午、晚餐定宵夜，随时随地都会系街边见到佢嘅身影！而香港有传统老店卖肠粉卖到被评为2017年香港米芝莲推荐街头小食，唔知咁多位心目中嘅肠粉边间最Top呢？
网民：“食猪肠粉系食回忆！”
相关文章：印尼炸蛋食谱｜李司棋面罩上阵整印尼酱料炸蛋 比咖喱好味劲弹油👇👇👇
NO.7 车仔面
车仔面系早期香港经济尚未发展时嘅产物，小贩只需用一架木头车，准备好汤头，面、鱼蛋、萝卜等配料，就可以即场畀客人自己搭配心头好，配料点拣都咁搭，想食咩就食咩，好味又抵食，系唔少香港人心中嘅必食之选！随住时代嘅发展，好多街边档都搬咗入铺，车仔面唔再有车仔，价钱都Double起跳，但依然有好多客仔捧场试晒全港嘅车仔面㗎！
网民：“以前用木头车喺街边食车仔面食晒尘，但依家食唔返𠮶只味！”
NO.6 大排档
知唔知点解大排档个铁皮全部都系绿色？唔系规定，只系当时绿色嘅油最平！而讲到大排档就不得不提“撚手小菜”，夜晚必食豉椒炒蚬、避风塘鲜鱿、煎蚝饼⋯⋯，用战斗碗配返两杯啤酒同朋友嘻嘻哈哈又一day，啱晒想要放松嘅香港人！虽然依家喺户外露天嘅大排档愈嚟愈少，多数都搬入熟食中心，但热闹嘅气氛同旧情怀依旧！唔知你心目中必去嘅大排档又系边间呢？
网民：“搬去室内都唔错，夏天唔洗咁热！”
NO.5 蛋挞
香港嘅蛋挞驰名中外，酥皮、曲奇皮都系经典之选，而两派各有支持者。酥皮香口松脆，曲奇皮牛油味加分，唔知你又系边派呢？蛋挞最令人回味无穷就系馅料好似炖蛋咁滑，外皮酥脆，呢道平民小食唔单只会出现喺面包铺、茶餐厅、酒楼，仲会出现喺各大酒店或高级烘焙店，后来更有唔同嘅新口味同食法。好食到有旅客临飞前走去再买三十盒返台湾，蛋挞果然系香港之光！
网民：“食过好多新口味，都系经典最好食！”
NO.4 牛腩、牛杂
牛腩同牛杂，大家都系牛，唔洗分得咁细？牛杂讲紧内脏，而牛腩就系肉，粉面铺多数两样都有，但牛腩就连茶餐厅、快餐店都有卖，但点解咁特别？因为间间用嘅酱汁同处理手法都系秘制，最常见系浓香柱候酱、清汤同咖喱，连埋粉面饭一齐食，真系食极冇停口！因为有预先煮好，上菜速度极快，平日返工返学平靓正必食之选！
网民：“外国朋友成日问食边间好，其实屋企楼下系最好食。”
相关文章：饮食热话｜揭秘韩剧隐藏饮食文化 落雨爱吃煎饼、寒冬照饮冰水？👇👇👇
NO.3 鱼蛋
讲到街头小食，无可能冇鱼蛋啦！鱼蛋多数用平鱼同面粉再油炸而成，食落口感弹牙，再加上唔同口味嘅酱汁，虽然系肥咗啲，但好味又平，依家就连便利店都有卖，够晒方便，相信绝大部分嘅香港人童年回忆都有佢。种类多变，仲有陈皮鱼蛋同炸鱼蛋，除咗喺街边食，更可以用嚟打边炉同BBQ，真心去到边食到边！
网民：“小息第一时间落去抢鱼蛋食！”
NO.2 烧味、叉烧
2011年研究调查指出香港人劲钟意食烧味，平均每4日就食一次，唔怪得会荣登榜二！而烧味嘅其中一种叉烧，旧年更被米其林评审员评为访港必食！焦甜蜜香红润肉质松化嘅叉烧，无论单食定双并又或者配饭面食，佢都依然系主角！不过论到烧味饭，除咗各种烧肉、烧鸭，其灵魂莫过于系姜蓉同豉油，不服来辩！
网民：“细个听呀妈讲生旧叉烧都好过生你，就知香港人有几钟意！”
NO.1 烧卖
烧卖由细食到大，一直都系香港人嘅早、午、下午茶或晚餐，每间卖嘅特色都唔一样，有嘅胜在酱汁多元化；有嘅胜在辣油惹味香口；有嘅胜在烧卖鱼肉口感弹牙，真系不分伯仲。网上早前更设立“香港烧卖关注组”，分享各间烧卖食评，吸引大批网友加入同媒体报导，唔知你的最爱又系边间呢？
网民：“要评好唔好食，其中一样系睇有冇万年豉油⋯⋯”
分析说明：本研究资料由《KEYPO大数据关键引擎》提供，分析时间范围为2023年3月26日至2024年3月25日。KEYPO观测港澳地区万个网站频道，包含新闻媒体、Facebook、Instagram、YouTube及各大讨论区、BLOG等，针对本议题相关文本内容进行分析，并根据网友就该议题之讨论，作为内容撰写依据。
本文分析之结果，非参考投票、民调、互联网问卷等资料，名次仅代表互联网讨论热度大小，不代表网友正负评价。
延伸阅读：
【本文由“互联网温度计DailyView”授权转载，研究资料由“KEYPO大数据关键引擎”提供。】
“本文内容反映原文作者的意见，并不代表《香港01》的立场。”