KOL话银行拒摸货按揭、炒家冇得炒　但唔知最大镬是勉强买楼的人

有KOL话，汇丰同其他银行唔做摸货按揭，炒家冇得炒，连蚀让都唔得，今次大镬鸟，不过KOL根本唔知道大镬的不是炒家，而是勉强买楼的人。

星期二晚，汇丰突然宣布唔做摸货按揭，及后仲多十几间银行跟随，不少一向睇淡楼市KOL立刻跳出话今次炒家大镬鸟，如果唔可以将摸货出售，想唔挞订都唔得。

KOL唔系几了解楼市，更加唔了解在楼市生存的炒家，银行话唔做摸货按揭根本是小题大做，而事实上根本冇人摸，又点会有摸货生意可以做，原因是银行几十年前已经唔做炒家生意。当时并不是受到什么法例所限，而是银行家明知那人是炒楼，虽然申请按揭，亦只不过防范在成交前未能将所买的单位摸走，银行辛辛苦苦批了按揭，到成交时那人话已经将物业摸走，银行岂不是白做，试过一两单，银行根本唔接炒家生意，除非炒家愿意最少做一年按揭，兼提早还款时会罚息，银行才会考虑做炒家按揭。

即使银行愿意做炒家按揭，炒家都会考虑成本太重唔做按揭，宁愿用full paid买楼，在成交之后才卖，不但可以卖到较高价格，而且物业是不会定位为摸货，银行是不会拒绝做按揭。相信今日如果有人攞一个物业去汇丰做按揭，而物业又没有按揭，汇丰唔会将物业定位为摸货，按揭可以正常进行，所以，汇丰唔做摸货按揭对炒家没有影响。

不过，对一些做错决定的人可能会有影响，不少人在买入一个物业之后才发觉是超出个人能力所限，以往有SSD，就必定要放弃，损失所有订金，现在取消SSD，即是将逃生门打开，但汇丰等银行唔做按揭，即使有买家愿意接手亦无能为力，做错决定的人仍然要损失所有订金，或者，将物业转售给一些可以full paid的买家，汇丰唔做摸货按揭原意是打击炒家，最后竟然益了炒家。所以话，即使系银行家，都唔系太了解楼市。

【财经专栏】汤文亮｜纪惠集团行政总裁

免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。

另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。