粥都冇得食！海皇粥店倒闭　高峰拥30间舖、啃得落40万舖租｜灯神

开业33年的海皇粥店喺周三（7日）宣布全线结业，震惊全港市民，突然“连粥都冇得食”，真系令人伤心。灯神有幸都喺海皇粥店关门前一个星期帮衬过其中一间分店，宜家谂返原来当时已经有唔少倒闭的蛛丝马迹。

倒闭前一周舖面仅一名楼面　冷气机漏水待维修

上个星期去到海皇粥店店舖门口，见到舖头入面只有一位楼面姐姐，负责晒落单上菜同埋收银，但间舖楼面目测都有过千呎，都摆到10几张台。之后灯神行到入去舖头，但个位姐姐见到我同友人，都完全无打招呼，亦无同我地讲话要坐边。咁我估可能佢都忙紧啦，就自己揾咗张台坐，后尾仲发现𠮶个位原来上面部冷气机漏水，有待维修，所以就自行再调位。

楼面失踪5分钟“似唔想做”

到灯神睇完餐牌准备落单嘅时候，一擡头就发现个姐姐已经唔见咗人，成个楼面都见唔到有职员。当时其实餐厅入面都有几台客，见到当中都有部分客想落单，大家唯有一齐坐喺位到等；最后等左5分钟先见到姐姐喺厨房行出黎逐台落单。职员整体感觉比人都系没精打采，“似唔想做”。

萝卜糕“成块砖”分量多到吓亲人

因为灯神个日胃口一般，所以叫咗个分量较细嘅餐，有一碗迷你粥、萝卜糕同半份油炸鬼。点知食物黎到之后，发现食物质素出乎意料地几好，口味同卖相都唔错，分量仲要多到吓亲人。本身灯神都预咗碟萝卜糕应该都系细细块架啦，点知送到黎竟然有“拳头”咁大，大到成块砖咁，个厚度分分钟厚过新年出去买𠮶啲一底底嘅预制萝卜糕。

呢个咁丰富嘅餐只系卖紧44蚊，平过好多茶餐厅午餐。当时灯神都心谂系咪真系做得住㗎，点知最后真系一语成谶，非常可惜。

高峰期全港拥24间分店　日常运作靠“五常法”

又有老字号倒闭，灯神当然感到十分难过，1992年创立的海皇粥店，虽然只系卖粥这一类平民食品，但其实过去都辉煌过，2017年就系佢地高峰期，当时全港拥有24间分店，其后高峰期听闻有超过30家分店。

佢地老细之一、执行董事萧楚基，果阵仲接受传媒访问讲过成功要素就系“五常法”。即系话店舖日常运作就要“常组织、常整顿、常清洁、常规范、常自律”，而且仲一早设有中央厨房，所以就唔会好似旧式食肆成间舖都“油立立”。

昔日雄心壮志话“有资格上市”　分店规模上望40间

当时萧楚基仲讲过，海皇粥店“有资格上市”，仲话会扩大规模去到40间舖，到时机成熟就去马。但时至今日，估唔到海皇粥店最终竟然突然倒闭，昔日的上市大计亦梦碎。

高峰期湾仔分店月租高达40万

昔日海皇粥店分店网络庞大，租金成本当然都好重皮，睇返旧资料，2017年3月海皇粥店喺湾仔庄士敦道本身都有间分店（庄士敦道137至139号新盛商业大厦地下及地库），合共就2,350平方呎，1993年已经由海皇粥店以每月16.5万元租用，其后去到2014年，租金已经升到37万元，不过一样被业主加租赶走。

所以当时海皇粥店就转租庄士敦道另一舖位（庄士敦道151至155号地下B舖），月租大约40万元，但系面积就有3,148平方呎，即系租金差不多，但舖位就大好多。由上述两个舖位租务来看，睇得出昔日海皇粥店承租能力相当不俗。

去到今时今日，工商舖价格大插水，商业物业租金同样向下挫，灯神相信舖位租金已经平咗一大截，但近年一众老字号都做唔住倒闭收场，睇嚟证明咗香港市民的消费习惯已经彻底改变，习惯北上或外游消费，呢一个趋势暂时仲未完，睇嚟一众老字号都要挨多阵。