绝处逢生！元朗旧楼业主被银主收楼仲赚到笑？全靠一笔横财｜灯神

身为业主最惊系咩？如果话第一系担心单位楼价贬值，咁第二惊嘅就一定系层楼被银主没收，沦为银主盘，最后仲要被人劈价贱卖出去。不过灯神最近收到代理朋友分享，元朗出现一单“戏剧性”成交，原业主虽然表面上被财务公司没收单位，但竟有运气眷顾，最后赚到盘满钵满。

讲紧嘅呢单成交就系元朗宏丰大厦中层单位，实用面积438平方呎，三房间隔。呢个单位原本系2024年11月已经以520万元卖咗出去㗎啦，点知当时个买家之后决定挞订弃购，成交取消。后尾原业主因未能偿还欠债，所以单位正式沦为银主盘。

银主没收完单位之后早前就叫价390万元放盘，最新就成功被区内买家睇中，重新减价到368万元沽出，折合呎价约8,402元。

↓↓宏丰大厦中层C室↓↓

成交价较挞订前卖平3成

即是话个单位嘅最新成交价系比挞订前卖平咗152万，减价29%接近三成。不过由于个单位早喺1996年11月已经买入，当时买入价系141万，所以即使卖平咗3成，个楼价喺呢29年间帐面升值咗227万，升幅达1.6倍。

买家需赔10%大订、劲蚀52万

睇返资料，单位旧年11月𠮶个520万成交其实已经“上咗簿”，签晒正式买卖合约。所以按普遍正式买卖合约嘅做法，估计当时买家挞订系需要赔返楼价10%嘅大订，即系足足成52万咁多。灯神都不禁好奇到底咩原因会令个买家赔咁多钱都照挞订呢？

原成交价创大厦历史高位、高市价至少三成半

咁灯神就睇返大厦过往嘅二手成交纪录啦，发现原来个次嘅520万成交价竟然系大厦嘅历史高位。除咗呢次之外，屋苑就净系喺2020年试过有一个520万嘅成交，单位系一个低层B室。但2020年嘅楼市仲处于高峰期就话啫，近年成个市跌咗咁多，呢个单位竟然仲追得返5年前口价都几“离地”下。

要知道过去一年大厦嘅二手造价都只系介乎300万至346万左右，呎价约6,849至8,649元，价钱相差至少三成半。

银行估价仅401万、“水鱼”原买家买贵3成

同埋相熟代理之后send咗啲单位相比灯神睇，其实入面嘅装修最多只算系不过不失，唔系特别靓，而且大厦本身楼龄都有37年咁耐。唯一嘅好处就系地理位置唔错，位处元朗区嘅市中心，步行10分钟就到西铁站。

所以实际上银行比出黎嘅单位估价都只系401万，系好合理嘅价钱；换言之即系买家当时用520万呢个价去买其实系买贵咗成3成咁多。可能就系因为个位买家签完约先发现唔对路，做咗“水鱼”；或者直头因为估价不足而借唔足钱，所以先蚀咁多都要挞订啰。

原业主继承单位后、多次抵押单位借贷

呢个行为就梗系益咗原业主啦，无啦啦收咗52万现金，赚咗一笔意外之财。有趣嘅系，头先咪提到个单位挞订之后被银主没收咗嘅；咁原业主个头先赚咗50万，无理由无钱还㗎㖞？

资料显示，其实原业主嘅呢个单位系家人送赠所得，佢屋企人早喺1996年以141万买入单位，然后喺2007年送咗俾佢。而原业主继承咗、收咗楼之后，喺2023年开始多次抵押单位向财仔借钱，涉及嘅金额至少有40万。另外仲有两笔借财仔的贷款，虽然未有写实贷款金额，但就写上货款金额“上限”系240万及420万元，睇嚟原业主都借得几多下。

任由银主收楼、独吞50万订

灯神喺呢度做个大胆假设，可能原业主收到笔赔订后根本就无谂住还钱，反正个单位当初都系屋企人留低，楼龄又旧；而个单位被银主收咗之后，之前借落个啲数都唔使再额外还，银主卖完楼之后分分钟仲有钱剩可以分返添。再加埋佢手上嘅50万现金，转头买过另一层都仲得！

换言之，原业主一分钱都唔使出已经食晒“买家”、“银主”两家茶礼，所以呢单成交佢先系最大赢家！