音乐圈打滚多年有话儿　卡式带乐团：点解追粮仲好似自己唔啱

卡式带乐团Cassette对你或许有点陌生，但当中两位成员却是熟悉的面孔，Aeolus是乐队Peri M的主音，Jonny是乐队Closer的Bass手。虽然两人同样Rock友出身，但Cassette擦出的火花并非只单纯得摇滚，而是想像空间较大的电子音乐。既然“少林功夫都可以加唱歌跳舞”，电子加摇滚又有何不可？
摄影：梁碧玲

Cassette组成的契机追溯到几年前，Jonny离开原有乐队后仍有一堆作品在手，当时还未想到要将作品卖掉或是留来自用。恰巧邀请到Aeolus帮忙唱Demo，大家都发觉电子音乐是一条“新血路”，所以一拍即合。

Rock友转玩电子似BB学行路

电子音乐的元素与摇滚乐与别不同，虽说未至于180度相反，但也算是跳出自己的comfort zone，感觉像是初生婴儿学行路。Aeolus说：“录音𠮶阵，监制要我掉开以往嘅唱腔，真系好辛苦，因为系自己唔想触及嘅范围。”Johnny亦表示，创作时“攞声”花最多心思：“音乐上自己脑入面都已经有份谱，但净系拣一个切合到首歌嘅鼓声都好用时间，要一路不断试。”他们希望可以像东京事变的Bass手龟田诚治一样，找到属于自己、最能代表自己的声音。

玩电子嘢有辣有唔辣
心水清的读者都会留意到，平时Cassette演出，Aeolus负责歌唱部份，Johnny弹Bass，背后丰富的编曲全靠事前编好的Programme。但Programme归Programme不似真人一样会“就吓你”，这正是难度所在，Johnny说：“出骚时听Click要醒十二分精神，唯有逼自己练得再准啲，因为少少偏差都好觉。”不过Aeolus却表示二人阵容更灵活：“其实做商演方便咗，因为容易控制声浪；如果一队Band做商场骚，一响鼓就已经会俾人投诉。”

点解追粮仲好似自己唔啱咁？

音乐人与其他自由工作者一样，收入不稳定的主要原因莫过于被人拖粮，Aeolus与Johnny于音乐圈打滚多年，同样也面过对这苦况。Johnny直言：“呢啲人唔守信用真系几讨厌，我唔明佢哋觉得做音乐系可以拖粮！当我谂住三个月后会收得番条数，可以够生活，点知突然冇𠮶下真系好徬徨。”他续说：“就连大公司都有呢个心态，我唔信佢哋冇钱啰；付出咗咁多心机时间，唔信我哋真系咁分文不值！”

除此以外，同行“做烂市”亦令他们感到非常头痛，Aeolus说：“有时追粮仲好似自己唔啱咁；另外，做烂市本身已经系唔尊重自己，呢个系专业呢㗎嘛！你付出咗心机时间，但对方会觉得，唱歌只需要擘大个口，结他弹几下就得。但其实𠮶旧钱系值㗎，系需要俾㗎；如果你乜都求其揾人做，咁咪出事啰！”

横又死掂又死，不如去尽啲啦！

虽然在香港玩音乐要面对的困难，有时比一般人多，但要找出路别无他法，只有坚持，Johnny笑言：“横又死掂又死，不如去尽啲啦！”正因为这份动力，令他们除了营运乐队以外，还得到不少幕身后工作的机会，例如Aeolus曾为卢巧音、何超仪、许靖韵等人担任演唱会和音； Johnny亦有为不同音乐单位填词。Aeolus说：“经过咁多年，要话俾自己听，既然选择咗玩音乐，就要努力揾方法令自己做得好啲之余，令收入稳定啲，令屋企人放心。”