【专访】神曲《一生所爱》仲有得改 卢冠廷：再做流嘢对自己唔住
卢冠廷(人称LoLo)可谓香港乐坛的传奇人物，纵横乐坛三十多年，笔下写过金曲无数。于90年代淡出，至2015年重出江湖，LoLo如侠客一样，隐居闭关过后，再出手定一鸣惊人。今年LoLo炮制新专辑《Movie To Music》，从以往写下的过百出电影配乐之中，挑选十首重新改编，歌曲同样以电影感为主轴，但用上不同风格诠释，突破乐迷的想像空间。
在一片“冇歌好听”、“我钟意听K-Pop”的声音之中，LoLo却要反其道而行：“年纪已经有番咁上下，唔可以再做啲‘流嘢’出嚟，唔单止对自己唔住，更加对乐迷唔住！”
摄影：江智骞
留喺Comfort Zone对呢个世界冇好处
艺术家总会觉得作品永远没有完美，总会找到自己的不足，LoLo亦如是，所以才会有新专辑《Movie To Music》出现。他说：“我想超越自己呀，以前做过嘅嘢我唔想再repeat呀！呢个系comfort zone嚟㗎嘛，你做到之后仲要repeat即系留喺comfort zone，你冇进步到，对呢个世界，对自己都冇好处嘅！”
“你要不停接受新嘅挑战，系难呀，咁你咪解决问题啰，世界上系冇嘢解决唔到！”
打破以往框框有妙计
《Movie To Music》中的歌曲由以往电影配乐改编而成，虽说那些配乐能够提供灵感，但始终于印象根深蒂固，要破旧立新谈何容易？不过LoLo却说：“好容易抹甩呢啲框框㗎咋！”并举《监狱风云》主题曲—《充满希望》为例。(原唱为肥妈Maria Cordero)
LoLo解释：“虽然当时个编曲都我系做，但系边个可以有肥妈个巨肺嗌到咁吖？冇㗎嘛，咁我咪要谂计啰！虽然我唱唔到佢𠮶种爆炸力，但系佢嗌𠮶part，我就用我嘅技术，用人声扮乐器，𠮶种震撼力一样好大。首歌个层次由好静，慢慢到鼓去bulid up，到我voicing出现，再到苏德华最尾出嚟弹嘅结他，简直系神来之笔，我只可以讲系无懈可击！”
“进化版”《充满希望》套番落《监狱风云》嘅场口一样match！唔信嘅你听下就明。
终极版《一生所爱》欢迎大家“挑机”
“苦海/翻起爱恨/在世间/难逃避命运……”《一生所爱》出自《大话西游之仙履奇缘》，当年的非主打作品，如今却红足几十年，亦曾被翻唱无数次，就连LoLo自己也改编再改编，他形容今次是“终极版”：“我觉得呢个编曲真系无懈可击，因为佢唔复杂，一个结他，一个Cello，一个女高音，一部电钢琴系咁多；依家你听落去，个感觉真系好似我同一个仙女对唱一样。”
他续说：“你唔会想像到可以出一个咁嘅版本，净系个intro一段吟唱部份，都好有《西游记》，古代魔幻片嘅感觉。所以我觉得系好难超越呢个编曲，我成日挑战出面，因为有好多翻版嘛，请做一个比呢个编曲更有感染力嘅，我都想听下，哈哈！”
将“终极版”《一生所爱》放番落呢个经典场口，有冇带俾你另一番体会呢？
这个“终极版”背后，其实也有一段趣事，LoLo说：“唱片公司话唔可以唔摆《一生所爱》，因为太经典喇！佢话‘你喺屋企弹就得㗎喇’，demo又好点都好，一定要有。咁我咪喺屋企弹啰，你哋依家听紧呢个就系揾个cheap咪嚟录㗎咋。”歌曲中的“仙女”是新晋女高音Alison Lau，由于乐器与人声的音域配合也有限制，经过几次反复磨合，终于成就了无懈可击的《一生所爱》。
年纪有番咁上下，唔可以再做“流嘢”
LoLo纵横乐坛多年可谓长青树，他坚持继续创作原因很简单：“自己年纪已经有番咁上下，唔可以再做啲流嘢出嚟，对自己唔住，对乐迷唔住！”他续说：“好多人留喺comfort zone就算，揾到样嘢见到卖得㖞，搞掂就去收钱，咁咪冇进步啰。”
正如2015年LoLo复出，推出《Beyond Imagination》专辑，颠覆多数经典作品，其魄力实在令人佩服，他说：“其实我都担心㗎，好似我啱啱出番嚟𠮶阵，头一只做得咁好，下一只点搞呢？到依家希望下一只又可以超越自己，我只可以讲希望，因为今次已经可以去到一个好高嘅水平。”
想知道更多LoLo老师如何处理流行曲与电影配乐嘅心得，记得睇埋另外两篇报道喇！
【专访】卢冠廷“奇招”成配乐大师 荷里活作曲家冇佢咁“巴闭”