撒哈拉沙漠马拉松｜63岁陈国强酷热下夺组别亚军　为太太中暑落泪

今年毅行教室一行16人，参加252公里撒哈拉沙漠超级马拉松。由一开始大家目标清晰，就是要平安完成回来。
文：陈国强KK Chan（撒哈拉沙漠马拉松2024男子60至69岁组别第二名）

今次已经是我第“N”次参加MDS（撒哈拉沙漠马拉松的英文名为Marathon des Sables，简称MDS）。1999年首次参赛，相隔25年后再参与，自己身体是否承受得住？教室成员的承受能力，又有无问题？作为日后参考资料，立即去片同大家分享下：

【Stage 1：30km】

晨早鸟儿好雀跃，但身体要负重约20磅、为适应当地酷热天气、由一开始就提醒自己要慢慢跑，打算用一两天去适应，𠮶种好似当年揹负氧气樽进入火场的感觉；慢慢跑亦系防止肩膊背腰受到磨损的方法。第一日走完、大家身体都较疲累，天一黒个个都好快入睡，但系喺沙漠边有咁顺利，瞓到凌晨约12时，刮起狂野的风沙袭击，吹到全部营每一位参加者都周身沙尘，直至三点钟。

【Stage 2：约40km】

今日目标系由尾段25km后，试吓畀少少速度﹐睇下身体承受感觉如何。过程总算顺利，完成达标。完成两天，组别排第五位。

【Stage 3：85km】

经过两天，已大概适应包括天气、用水量、食物能量和配速。起步前大会提醒所有参加者、今天特别热、所以自己定下目标，希望平均配速每小时走6公里、但系走到CP5时，真系有少少“搞唔掂”，烈日当空下有中暑感觉。决定休息10分钟，畀身体回一回，喺呢一刻脑海立即想到太太同团友情况，应该比我更加辛苦难受，希望佢哋唔好有事、否则自己会好内疚 。

最终用咗14小时30分，比预期慢咗30分钟，而当日据报有60多位参赛者因中暑而被退赛。

经过三场后，头两日领先嘅法国跑手阿Paul，而家变咗第三名，自己组别名次仍然排第二，第一名就变咗葡萄牙跑手Jose（Jose Luis GUERREIRO DOS SANTOS）。

【Stage 4：43km】

今日开始要全力出击，气温亦系非常酷热，起步三个老人家沿途互相追逐，走足30km。之后见到前面有沙石山出现，加上系中午，但长途跋涉嚟到，几辛苦都要顶埋佢。庆幸在这路段自己放甩咗，快过佢哋31分钟先冲过终点（但系同冠军总时间仍差5分钟）。今天大部分参加者都是下午陆续回来、所有人过终点都有啲晕吓晕吓、当然令我最心痛及担心的，就是太太中暑有啲不省人事。我在终点接她回营中，躺在地上30分钟叫都冇反应，𠮶一刻自己都流咗下眼泪，愿主保佑。 最后好彩平安冇事、感谢主。

【Stage 5：31km】

经过连续几日竞逐，第三名应该已追唔到自己，即系话，今日31公里全力一拼，尝试争取第一！起步一开始大家沿途你过吓我、我又过吓你，跑足30公里。原来几天的拼搏，好多沿路参赛者都见到我哋两个傻佬系咁“互𠝹”，最终今日都系输咗2分钟，总时间相差7分钟……深夜又刮起风沙，又瞓少了两小时、话咁快又起身准备啦。

【Stage6：21.5km】

今日要做嘅“就系输，都唔要输得再远”。

可能大家的背囊重量轻晒，一起步大家就全力畀油，以咁多日嚟最快配速前进（1小时走10公里），沿途都有其他跑手为两老加油，但系返到终点，Jose跑2:05，而我就2:06，总时间33:56……最终组别第二名。

今次系我参加咁多次撒哈拉沙漠超级马拉松赛，最好成绩的一次、亦系最开心同最享受的一次、最难得就系沿途有一个非常互相欣赏嘅对手、才令大家发挥最佳竞逐精神。将来的事，只有将来知，人生就是这样。

今次沙漠之旅，仲有一样值得开心嘅，就系教室一行16人都能够全部安全完成，最难得就系可以同埋太太一起第二次参与。

感恩。

【本文获作者授权转载，原文刊于KK Chan 毅行先生社交网站；部分内容经编辑修改】