揾工｜上司爱邀功、说话总带侮辱？　遇着3种老细辞职转工不为过

可以开行turbo做嘢真系一件好爽嘅事，尤其是当你有一班好同事，而工作内容又开正你𠮶范，真系会好有满足感。但唔系个个咁好彩，唔少老板都系“地狱使者”，誓要令你无好日子过。为咗份粮无奈要留，或者等紧机会走都好，一定要学番两招傍身，就睇睇以下真人真事，参透甩身大法！

3种职场常见的乞人憎上司：

1. 抢功劳型老板

“当时，我系一家media agency嘅市场部主管，我好喜欢我嘅工作，亦都相信自己做到嘢，对得住啲客，但，唯一嘅问题系我经理，每日最烦就系要同佢接触，我哋成team人埋头苦干，佢就会不停地徘徊系我哋身边，又会改吓呢样改吓𠮶样，都系一啲细眉细眼位，对个客根本冇帮助。到我哋present时，佢就走出嚟领功，讲到自己lead住成team人做嘢咁。其实佢最多系行行企企，巡吓望吓我地做嘢，开电脑facebook messenge吓，扮吓工又一日。但当然，我哋冇笃佢，因为佢系大老板个老友”。

如果你从未遇过咁嘅上司，恭喜你！每间公司都总有啲咁嘅老屎忽，唔公平嘅事一世人总会遇到几单。以上例子，当你直属上司同权力中心好friend，好难直接投诉，但唔等于要哑忍。

一个得体嘅方法系：send个email同老板讲你以及其他同事的工作情况，又或者要老板call一个工作模式的meeting，事前同定同事通气，约佢地出席，在会中讲你哋嘅工作情况，讲上司的管理手法有咩可以调整，帮助同事工作。

当然，见好就收，唔好搞大件事影响自己友。英明嘅高层自然会处理，相反，佢地唔理，你搞几大都系晒气。

相关文章：【半泽直树】“凡事都跟上司争没用的！”　点评第二季8大金句！

2. 侮辱型老板

“我是公司CEO嘅私人助理，经常畀佢踩低，佢会改我花名，仲笑我乡下妹。我已经服侍咗佢两年，系佢口中听过算最好听嘅说话系“至少睇落似番个5岁嘅人做嘅嘢”，而𠮶份“嘢”系一份我帮公司一个长期partner拟订嘅proposal。”

有时候，跳出“comfort zone”，离开一个熟悉嘅岗位好难，即使个zone根本唔comfort，要开口寻求改变，仲要系叫老细改变，随时自己揾自己笨。但如果佢哋唔愿意改，而你只系职场新人，例如个人助理，咁你大可以积极考虑转工，放自己一条生路。

宜家其实好多人都每两年就跳糟，唔好觉得自己欠咗公司，人来人往好正常。如果你老板真系衰到要闹“你老板！”，你亦冇信心可以憾动大山令佢哋变好，不如把握机会，前进去下一个工作里程碑啦！

相关文章：自我管理｜为何成为职场好欺负的人？　如此反击才能重掌沟通上风

3. 乜都管老板

“我最近开始每星期有两天home office，老板同我用skype实时沟通。点知我一唔显示online超过2分钟，佢就即刻message问我去咗边、做紧咩、点解唔做嘢等等。佢开始要求我每一个动作都要通知佢，确保我有嘢忙，无论饮杯水，食块饼，甚至人有三急，我都必须先报告行踪再行动，remote office根本惨过系公司做嘢”。

畀人监视你每一个动作真系好恐怖。呢种变态老板难以合作，因为佢地不断要员工update会直接影响生产力。与其畀人问问问，醒目嘅对应方法系：自我报告。

每当你做新项目时，话佢知，但唔好讲太多细节。挤牙膏咁，逐少逐少咁等佢有嘢知下，一开始可能会好烦，但习惯就好，因为而家系你烦佢唔系佢烦你。

有啲老板系好难相处。好多时，打工仔冇得唔硬食。唯有见招拆招，烦就一定会，但总有行动可以做可以改善。更重要系，呢个世界唔系得一份工，东家唔打打西家，有心总会揾到啱你嘅工。如果真系好难顶，quit！

相关文章：【辞职】上司朝令夕改、脾气差最虐心？　9种老细行为随时激走人

【本文获“vanna.com”授权转载。】