女上司善变、易妒忌？打工仔女有共鸣：“惊青”最令人无所适从！
上司有好多种，衰上司更加可以细分多种唔同衰法，例如：见高拜见低踩、塞死猫比下属、用人唯亲、抢功劳……种类之多够讲三日三夜，但今篇我想讲下，有啲“职场毛病”系特别容易出现喺女性身上。
作者：诗宁
讨论之前，我必须重申，并唔系话男上司比较好，只系男同女嘅衰嘢不相同而已。如果你系上司，停一停谂一谂，自己有冇唔小心犯紧以下乞人憎毛病？如果你系下属，提醒自己，他日成为上司之后，千祈唔好变成咁样。
第一类：惊青
呢类上司处理日常工作安安稳稳无咩大问题，佢亦会希望下属处理Project都系跟日常程序，唔好寻求突破、唔需要制造挑战性。一旦出现突发事例如大老板失惊无神将Project A嘅Deadline改早咗，惊青上司就会吓到成个弹起、六神无主，冲去同班下属讲要做快啲，甚至打乱下属手头上工作，叫佢哋立即开会／立即开Project A个File出嚟睇下进度……总之手上处理紧乜都好，都要放低而优先处理Project A。
但若是一个好上司，收到大老板Order之后，最基本嘅处理方法系先冷静消化个Order，再谂谂每位下属手上处理紧乜，边个嘅能力、时间比较适合优先处理Project A？其他同事可以点配合？重点系，唔应该等到突发先叫同事开个File出嚟睇，而理应系一直都知个Project进度。
第二类：妒忌
所谓棒打出头鸟，职场上忌才好常见，大老板睇好你咩？大把人眼红，想尽办法比陷阱你踩，阻止你升职。若妒忌系建基于“公事”，都有得防而且都合理，但有啲妒忌系更加无聊和无得避，就系纯粹私人上睇你唔顺眼，例如你上司觉得你靓过佢、后生过佢、好多男同事钟意帮你……
曾经有个刚毕业的女同事Jennifer，比较钟意著背心返工，皮肤白白而且几受男同事欢迎，当时的女上司Christy经常问Jennifer：“乜你唔冻咩？”、“你屋企件件都系背心？”呢个系上司而并唔系你阿妈，无缘无故咁“关心”你冷暖，又点会无弦外之音吖，唔少同事都听得出亦睇得见Christy眼神中的不满，偏偏初出矛卢的Jennifer完全感觉唔到。
直到有一次，Jennifer喺一个Event当日请咗Sick Leave，令到件事有少少甩漏，Christy喺事后的检讨会议中“教导”Jennifer，并爆出一句：
“都叫咗你唔好成日著背心返工啦！公司有冷气，点解你唔加返件外套？搞到冷亲要请病假，少咗个人就容易出错，其他同事要补你个岗位好辛苦㗎……XXXXXXXXXX我唔系想针对Jennifer，为咗成条Team著想，各位女同事配合下，以后喺office唔准著背心，必须要著有袖嘅衫而下身最好著裤，除非当日有特别Event要著裙。”
大家呆一呆互望，真系估唔到上司会将一件事嘅错漏归究于同事的背心上衣，而唔系检讨下人手安排之类。
相关文章：
女上司总是“生人勿近”？细数Boss Lady的“三宗罪”……
第三类：善变
“女性是善变的”，呢句说话你应该有听过有遇过或者自己有做过吧？遇著一个善变的上司真系好痛苦，我旧上司Christy，佢嘅善变指数登峰造极，交一份唔重要嘅文件比佢，佢都会逐粒字同你睇、同你改，例如系自己Team内的会议纪录（只系用嚟写低ABC同事今星期要负责乜嘢），一句简单句子如：
“Peter将于下周一前把Project A完成并交予Christy 签署。”
佢会叫你试下改成：
“Peter将于下周一前Project A完成并交给Christy 签署。”
好啦改俾佢，然后佢叫你试下再改：
“Peter将于下周一前完成Project A并交俾Christy 签署。”
其实份会议纪录又唔需要俾街外人睇，改来改去同一个意思，纯粹为咗满足上司Christy的善变心情，改来改去无咗大半日，当然系做唔完其他工作而要OT，令人十分沮丧。
每个人都有唔同性格，最紧要系做到“公私分明”，唔好将私人情绪或无聊喜恶带到工作，咁已经可以减低自己变成“乞人憎上司”嘅机会。