【办公室生存手册】一个知等于全公司都知！私事讲几多先系太多？
人系群体动物，返工除咗做做做，都需要同同事倾下偈，否则好易会癫，而倾倾下又难免会提到一啲私事例如家庭、感情状况。需知道，你只要将啲私人嘢讲过比一个同事知，好快就会成间公司都知，而完全唔同人倾偈或者保留太多神秘感又好易变透明，究竟返工应唔应该比同事知自己私事？
未摸清各人性格 不需急于交朋结友
一个理想嘅工作环境，当然包括同同事变成可以互信嘅战友，但人心隔肚皮，未睇清楚一个人之前，你真诚热情，唔等于对方都系同一个心态，所以，即使你有件无伤大雅嘅“私事”想分享，喺讲之前都要三思，你打算开心Share但听入耳𠮶个可能会接收成负面想法。
就以“你有无男朋友？”呢条咁简单嘅问题为例，可能你唔介意比同事知道你感情状况，但答“有”同“无”已足以影响上司对你嘅睇法……
延伸阅读：前副总裁变娃娃达人：唔可以一出嚟就追梦，要受啲苦，果啲系经验
我其中一位旧上司Christy，约35岁，多年无恋爱，为人妒忌心极重，亦好钟意同人比较。Christy有个习惯，就系每有新同事加入，佢都会喺Welcome Lunch问人“有无男朋友”，如果答“有”，佢就会继续问人男朋友系做边行呀？住边区呀？无论答案系咩，佢听完都会流露出一个不屑的表情，又或者系加一两句Comments如：“吓，你男朋友做IT？一定系闷人啦！”、“吓，你男朋友系厨师？咁咪成日都有阵油烟味？”除此，佢仲会认定“有拖拍”嘅同事系挂住拍拖唔肯OT、返工时间成日玩电话等等……呢啲“指控”未必系真，但已经喺佢心目中扣晒分。而答“无男朋友”嘅同事呢？就相安无事，因为对Christy嚟讲，呢班同事系“自己人”，同佢一样无另一半，亦演绎成“比较搏”。
当然唔系个个上司都好似Christy咁极端，我举呢个例子，系想提醒大家“言者无心，听者有意”有时你觉得系开心事例如同另一半试咗间新餐厅想推介、识人帮你买到个限量版手袋……此等小事想分享都要睇对象，唔系人人都钟意替人高兴的。
延伸阅读：【周秀娜专访．爱情】拒绝“30即嫁”：宁愿单身，好过一起不快乐
解决办法：九唔搭八！
被问到一啲唔想答／唔识答嘅私人问题可以点？世上除咗黑与白，都仲有灰色，真系唔知点应对嘅时候，不仿讲啲似是而非嘅答案。再以“你有无男朋友？”为例，你明明有但唔想讲，你可以答：
拍拖呢啲嘢，真系要花时间同精神，放工已经攰啦，早两日份Proposal我仲未做好呀，睇嚟今晚又要OT……
你信我，好神奇架，你讲其他嘢，大家可能无咩反应，但只要呻公事、讲OT，话自己忙，大家就会仆出嚟话“我都系！”然后就斗数一堆手头上嘅工作，直到得到一句：“哗你真系好多嘢做”先会停。无论之前讲紧乜，只要你用繁忙嘅公事兜去第二度，就无人记得原本嘅话题系乜，因为大家连餐饭都无心机食落去。
同同事交心，真系要睇你做咩公司，细公司几个人易混熟又少斗争就无咩所谓，大公司人多口杂，一日仲系同事，都系有所保留好啲，想揾百分百知己？建议都系留待辞职之后。
延伸阅读：