【任噏乱评】谭芷昀真系赢在起跑线　有几多天才童星被埋没？

今年只得9岁的“香港小巨肺”谭芷昀(Celine)近日参加《全美一叮》(《American’s Got Talent》)第12季比赛，选唱《铁达尼号》电影主题曲《My Heart Will Go On》而一战成名。该节目Facebook专页及YouTube官方频道只是一天便有超过2500万和460万浏览量，不少人都称赞她的歌喉。一名得9岁嘅小朋友，能够喺台上唱只咁高音嘅歌，而且仲咁有台风十分镇定，睇得出系久经训练。其实Celine喺呢个节目之前已经参加过唔少歌唱比赛，大大话话都有成廿个，已经有唔少喺中国参加乜乜晚会嘅机会，佢自己都曾经喺四年前开个个人演唱会，认真巴闭！

点解细细个就可以咁有型有格？除咗有天赋之外，皆因佢仲有个好爸爸！谭顺生（Steve）作为一个专业的唱歌及钢琴老师，一早就已经发现囡囡嘅音乐天份，所以除咗自己培养佢之外，仲送咗佢去家燕妈妈艺术中心度学唱歌跳舞。而且还不时带佢出去表演，除咗之前访问透露过会带囡囡去地铁唱歌练胆量之外，还会运用自己的人脉关系为囡囡争取更多演出机会。根据其他传媒报导，为了唔影响Celine的学业，Steve宁愿自己辛苦都要住喺月租成七万蚊嘅山顶单位，就系为咗囡囡可以读该区嘅国际学校，认真唔话得！当然，作为一名专业的音乐老师要拎出呢啲钱其实唔系咩问题，所以Celine在天赋同后天培养方面都可以话系得天独厚，成名绝对唔系侥幸！

但系，如果剩系得天赋，无咗后天培养又会系点呢？如果Celine唔系出身一个音乐世家同埋叫做有返咁上下家底的话，佢而家条路又会系点行？起码如果佢屋企唔系有钱，未必可以俾到钱佢去美国表演，唔会可以跟到家燕妈妈学嘢，更加未必可以行唱歌呢条路，因为靠唱歌未必揾到钱。而家普遍家长都觉得读书先系最重要，音乐、运动、艺术等等只可以当系兴趣，上吓兴趣班系无问题，但唔好当系一个终身职业啰！如果唔系点会有人讲运动其实无乜贡献，又点会有咁多为咗唱歌挨穷挨饿嘅歌手出现，讲到底都系香港普罗嘅价值观系咁，有人话过香港其实系一个文化沙漠，都唔可以话系错晒，因为好多人都为咗现实而扼杀咗好多可能性。好在Celine爸爸本身都系音乐人，唔会存在歧视艺术的问题，又好彩佢老爸并唔系一个穷嘅音乐人，如果唔系可能变咗带个囡出街头卖唱。亦都因为有钱，佢唔使焗限喺香港参加节目，可以返大陆出美国，你知香港人几咁钟意乜都踩几脚，如果同一个情况喺香港发生，可能就会出现话Celine老积、扮大个、乱嗌一通，未必可以好似喺美国咁得到咁多人嘅赞赏。

想当年赵展彤12岁参加《超级巨声》，先唔好谈论两个人唱功上有无高低之别，但当年一出已经负评如潮，根本没人留意她的歌声。一来是因为当年还细的她态度性格问题有被宣染，二来又未必有人好像Celine爸爸Steve一样咁熟悉呢个行业去教佢，所以Celine今次成功其实背后需要有好多支持先做到出嚟。比著系穷人家庭，Celine可能都会俾人赞唱歌好好听，不过只系赞吓啰，可能佢屋企人会多啲带佢出去唱K拎吓虚荣感，之后？咪继续读书返学啰。喺学校可能可以参加吓啲歌唱比赛拎吓奖，之后俾人发掘吓，从一个穷家出身的歌手出发，浸返几年可能会出名，又可能因为时间磨蚀晒所以灵气，总之好难会去到而家喺美国献唱嘅人气高度。说到底，起跑线真系好重要，因为可以令你事半功倍，加埋marketing嘅包装更加可以令你一夜成名。我地唔系要去质疑Celine嘅能力，而系应该检讨吓有几多个Celine无被发掘出来。