【任噏影评．神奇女侠】女英雄电影开先河　黑寡妇红女巫几时有？

作为今年第一部DC英雄电影，亦都系重头戏《正义联盟》的前哨战，好多人都会抱住好大期望去睇《神奇女侠》。谂返起上年《蝙蝠侠对超人：正义曙光》上映，啲批评多到我都唔记得有咩位系被人赞过，不过神奇女侠呢个角色就俾人赞到飞起，又身材好又靓女，的确系值得俾人赞嘅，而且佢出镜嘅画面又唔多，身世又神秘，观众们想插都揾唔到位喇。呢位以色列女星姬嘉铎（Gal Gadot）自此成为了DC重点计划嘅人物，除咗今集之外，之后套《正义联盟》都系重点登场。呢套电影票房喺今日已经有成2.2亿美金，搞到导演都已经喺访问中放风话会开拍第二集，不过就连剧本都未有。

喺戏外就威到尽，名利双收，讲返套戏入面嘅神奇女侠，呢套戏系讲返佢点解会出现系地球。作为神之女的她一出世就喺一个隔绝世界的天堂岛度长大，自小习武，被众人灌输战神阿里斯就是战争之神，只要消灭佢就唔会有战争。喺一次机缘巧合之下被佢撞到男主角，跟住就跟住佢返另一边打紧第一次世界大战嘅世界，谂住消灭阿里斯就唔会再有战争。佢就系本着呢个天真嘅想法，喺途中都不停话要消灭呢个战神，真系好烦胶，连个奸人服毒自杀以前都要问佢系咪俾阿里斯控制，可唔可以唔好咁天真呀？直到最后俾佢真系消灭咗阿里斯（其实大家都系神的儿女，点解可以咁轻易俾人收档？），发现人类根本唔会因为咁而停低战争，先至开始醒觉。虽然系天真咗少少，不过今次DC好成功咁为女英雄开创咗个先河，要知道Marvel入面嘅黑寡妇同红女巫都未可以自己开部电影，今次《神奇女侠》咁收得，Marvel𠮶两位又系咁索嘅女星，人气都算高，跟住个步伐开个人戏都唔出奇，到时观众就真系大饱眼福喇。但系呢套戏都有啲斟酌位，就系唔知点解有好多特写镜头，虽然Gal Gadot系索女，不过岁月不饶人，尤其系鬼妹仔好易老，已经32岁嘅佢一放近睇就见到有唔少眼纹，虽然唔会因为咁就影响佢嘅形象，但系都唔需要成日特写佢呀？

套戏其实都系一般英雄片套路，讲佢点成长，点样遇到大佬，最后点样消灭佢。不过正如上文提到终极大佬阿里斯被神奇女侠一个爆seed就玩完，真系弱鸡咗少少，呀女侠除咗一开头救唔到自己师傅同埋打完大佬之后心灵空虚咗一阵，其他时间基本上系个人表演时间。而且打斗场面真系少得可怜，打终极大佬全程都系CG画面咁滞，系得一开头喺天堂岛打团P先至叫有动作睇吓，呢度系有啲失望。同埋条爱情线，男主角只系同女侠经历咗少少嘢就成功俘虏咗佢个心，好似硬加插条爱情线落去咁。尤其佢咁快就可以钖Gal Gadot，简直系粉碎咗唔少男观众嘅心，好彩去到电影最后佢系死咗，我谂唔少人都会觉得佢嘅死系应该。