【任噏观点】唐宁离婚代表童话幻灭？　唔好盲信爱情formula

对于好多巴打，35岁冻龄唐宁宣布离婚，可能系最佳福音，女神回复单身，仲唔大叫“机会嚟啦！飞云！”？当然，呢啲只系FF，回到最初的起点，眼见连唐宁这位有仔有女，仲成日见到佢嘅幸福家庭照既女性、名符其实就系大部分女生最梦寐以求嘅的生活，可惜最后都要离婚收场，不禁让人王家卫上身：“我开始怀疑，在这个世界上，还有什么东西是不会过期的？”唐宁咁Sweet都要离婚，就系因为呢个case，大家就无限想像，爱情真系冇永恒？

爱情理论世上总有一千几百万个，其中一条formula都有唔少女仔都buy，就话：女仔要趁人生黄金时期揾到自己嘅Mr Right，然后拍一、两年拖再结婚，就可以同对方行一世，咁就fit晒。具体咁讲，女士们25岁之前好揾到男朋友喇，拍拖唔驶特别长日子，然后27、8岁拉埋天窗，仲可以赶喺适婚年龄完成㖭！从此就过著开心快乐嘅生活喇！呢一切都好似一个完美Planning。再套用落唐宁身上，25岁同邓伟杰相恋，然后28岁结婚，虽则系奉子成婚，但建立家庭之后，唐宁相夫教子，成为大家公认嘅好妈妈，同条formula大同小异，听落仲几sweet吖！但最后都难逃比《兰花刼》大嘅劫：离婚㖞......咁系咪代表呢啲惊世formula根本唔work呢？一班以结婚为依归嘅女生，见到呢单新闻后，到底要相信啲咩，先可以继续寻觅一个人可以同你过世？

睇返而家流行嘅爱情理论，充斥住“男友有了以上几个特点，可以跟他一辈子”、“5个特点看看他是否真的爱你”等等.....系！冇错！大部分女仔都系想揾返个Mr. Right啫，啱晒理论所讲嘅条件，就落足重注。不过，好彩地男友啱晒咀型，系咪代表坐定粒六，注定晚年无忧呢？万一Touchwood讲句：一日Mr. Right，之后唔系呢？咁系咪又要讲：“错的时间，对的人？”去揾借口？而唔系反省喺呢段爱情，自己付出过啲咩呢？

呢啲理论令人误会揾到Mr. Right结埋婚就代表达阵，但婚后嘅生活点样维持呢？似乎冇乜人在意。有一句说话，睇叶念琛电影都知道：“爱情一耐咗就变感情。”但系咪必定要咁嘅结局？其实讲来讲去，与其揾个Checklist测试对方系咪最好一个，不如真心相信“感情好与坏，在乎沟通与关怀”听落好似好废，但总好过耳濡目染，盲信符合几个理论加几单新闻，无限FF“世上无真爱”！始终爱情系要维系嘅。