【任噏影评．原谅他77次】维系感情唔好靠小气簿　原谅太多变老奉

提到近年港产爱情电影，大家一定会谂起叶念琛一系列嘅公式电影，一系就《志明与春娇》系列。上星期又上咗套，就系改篇自李敏同名小说的《原谅他77次》，其实77次只不过系一个数字，拍拖点会真系计足77次就分手先得㗎。一开头我真系觉得阿Sa饰演嘅Eva好“港女”，郁下就闹Adam(周柏豪饰)兼记录在案，睇到有啲想撕烂本小气簿，但最后我觉得Eva其实一啲都唔港女。

学戏中阿Sa话： “人生，为真爱付出过，才不枉此生。”呢句虽然好old school，但起码成班睇到班女观众劲buy先。读法律嘅Eva同Adam呢对由大学已经一齐嘅情侣，女嘅就顺理成章做律师，男嘅就为父母压力先读法律，毕业之后做一阵律师就辞职，要女朋友好似阿妈咁踢下佢先识揾工，讲真边有女仔唔想男朋友脚踏实地打份工，我都要为自己计划下将来㗎嘛，你咁样真系令到我好无安全感啰。当自己有返咁上下年纪，拍拖到一定地步，适婚年龄又快到，最怕爱情变感情，尤其身边𠮶位好似长唔大咁，同佢讲结婚一定唔会肯，生小朋友更加系遥不可及嘅事。港女系恨嫁但又惊嫁错，见到男朋友同自己屋企人一见面就狗咬狗骨疯狂闹交，自己夹住系中间做磨心，想佢哋修补关系真系难过登天，完全唔敢想像将来男友变做佢哋女婿嘅情景。

讲到生日礼物就火，我认为最紧要系有心思系唔hea嘅都算，但Adam用咗接近成皮嘢买1TB嘅云端服务送俾女朋友做生日礼物，1TB究竟送俾𠮶女仔有咩用呢？用嚟download韩剧？(创意嘅嘢我识条铁咩)。以上种种行为应该可以两个字黎形容—“幼稚”，而Eva都只系发下老脾呻下就算，因为佢咁做都系想为Adam好，至少呢啲系可以原谅嘅范围。

爱情无分对错，始终事实是残酷的，性格唔啱就系唔啱，分手只不过系迟早嘅事。虽然女仔𠮶心系好想无限宽恕对方嚟维系段感情，但只得自己付出，话唔攰系假嘅，因为原谅得多就会变习惯，人哋会当你“老奉”。希望睇完呢部戏系嘅你，唔好真系揾本小气簿嚟记录男友得罪自己琐碎事嘅过程啦。