谭芷昀9岁成名注定沦为生财工具？童星爆红不一定是父母阴谋

话说近日有位9岁小妹妹谭芷昀参加《全美一叮》，一曲Celine Dion《My Heart Will Go On》技惊四座，条片upload咗上YouTube一日，就已经有二千五百万人click爆嚟睇。呢位妹妹就咁红遍美国，再以音波功传到香港，都几厉害。之不过咁，网民嘅意见就好两极。有人欣赏妹妹人仔细细就可以踏台板，仲要喺异乡，打开嗓子唱歌，斋勇气已经加晒分，对比起好多人嘅童年，可能已经缩咗；不过另一方就觉得有问题，皆因小妹妹得9岁，仲有大把日子，点解唔等佢读完书先参加比赛？会唔会系父母想将个女当摇钱树，就连学业都唔理吸咗金先？

《全美一叮》节目，向来都有不少幼童、小朋友参加，就好似第11季咁，冠军Grace VanderWaal都只不过得12岁。赢咗之后，仲喺上年出埋碟做唱作歌手，更被睇好佢系下一个Taylor Swift。小朋友参加呢类型比赛都屡见不鲜，不论系《全美一叮》或者系《全英一叮》（Britain's Got Talent），甚至系香港嘅《残酷一叮》、《超级巨声》（呢个世界实在太多比赛喇），都总会有小朋友嘅踪影，但点解今次谭芷昀一上台，扬名国际，就畀人大力批评呢？唔通其他人就唔使理会学业？真系百思不得其解。

有人就话，小妹妹谭芷昀就畀父母推出嚟做摇钱树，有可能系被逼。记者就喺一年前采访过谭芷昀签约GME China唱片公司记者会，都有听过Celine Dion的《To love you more》，同样都系高音劲，震音到震撼。小妹妹回应记者问题，答案都比同龄小朋友显得老练，正如大家喺YouTube所见咁。而过去谭芷昀参加过N咁多个歌唱比赛，小型嘅唔在讲，就连《中国新声代第二季》都参加埋。照咁睇，呢位小妹妹有晒出道的预备，答问技巧、台风、压场表演都一早训练有素，完全100％系个表演欲强、享受舞台嘅小朋友。再加上，如果小妹妹唔喜欢的话，其实佢可以Say No。相信有唔少人的童年都被父母逼学弹琴，后来因为唔钟意都放弃。只不过谭芷昀有天份之余，咁啱有个同样醉心音乐嘅爸爸，将囡囡加以训练，将资质再激发出嚟啫。至于作为爸爸，又点会唔知仔女要读书？记得上年访问谭爸爸讲过读书与唱歌会分明，会做好手上功课，先至会安排表演，做家长就系做决策角色，尽量唔会盲目接Job。

至于要个小朋友出嚟，系咪代表推佢出嚟做摇钱树？有网民亦质疑作为歌唱老师嘅谭爸爸，有可能藉囡囡人气火热，借啲意sell埋自己只新碟。姑勿论系咪买细送大，其实都有唔少类似嘅例子。好似7岁就参加《全英一叮》嘅Connie Talbot，佢成名之前，其实父母为帮补家计，就算Connie几咁钟意唱歌都好，都冇钱畀佢学声乐。直到见到个女真系钟意音乐到一个地步，先至参加歌唱比赛，结果一举成名，依家仲年赚一百万㖭。不过Connie甚少畀人评论系家人嘅生财工具，一般只系着眼Connie歌喉、大个咗咩样......极其量咪耻笑下啲化妆技巧。反而大家系关心唱功，而唔系细心研究父母有咩阴谋。