【任噏影评．加勒比海盗】无限复活你玩晒　专心睇女主角好过

《加勒比海盗》呢个系列出到第5集，之前𠮶集有几烂都好，大家都会入场支持，点解？一来Johnny Depp魅力没法挡，二来我觉得成套戏最吸引嘅，唔系剧情，唔系打斗画面，当然亲情爱情都要放埋一边，而系女主角Kaya Rose Scodelario。呢位索爆女星今集一出场就抢晒大家嘅焦点，尤其佢件紧身衫，性感得嚟又充满美感。当有一场戏佢要除衫跳海𠮶阵，我谂好多男观众嘅反应同Johnny Depp一样好鬼期望，可惜佢只系除咗一件外衣就算数，大失所望。呢位25岁嘅女星已经喺唔少套电影担正做女主角，最为人熟知一定系《移动迷宫》系列，2018年第3集都会系佢主演，前途真系无可限量。

讲返套戏，其实拍咗咁多集啲剧情已经拍到烂晒，不过佢胜在可以不停咁复活，有排玩。今集喺最后部分前３集的男女主角Orlando Bloom同埋Keira Knightley又出返嚟，好明显就系为咗之后𠮶集铺路，加埋个片尾彩蛋，之前个心脏被刺穿嘅鬼船长又出现返，所以又可以reboot再嚟多次。其实讲到尾最衰都系今集个男主角Henry Turner（Brenton Thwaites饰），如果唔系佢打爆咗支海神三叉戟，所有嘢都唔会发生，一切可以喺呢集都完结。讲真，𠮶支海神三叉戟，英国海军又揾紧佢，Johnny Depp又要揾佢打亡灵，Barbossa（Geoffrey Rush饰）又要揾佢保宝藏，Henry又要揾佢救老窦，今集奸角Salazar（Javier Bardem饰）又要揾佢统一海洋，女主角又要揾佢证明老窦讲嘅嘢，咁多人为佢打生打死，剩系出咗几分钟就打爆佢？虽然系剧情需要，但系话晒都叫做远古神器，俾多几个镜头佢都唔过份呀？讲起剧情，有唔少人都留意到，只要俾之前个女主角锡过就一定会死，今集最尾佢同Orlando Bloom久别重逢又嚟咗个世纪之吻，唔通下集Orlando都系逃唔过死嘅命运？不过唔紧要喇，反正死完又可以返生。