无线免费播足总杯决赛　阿记死忠袁文杰：起码唔使上网揾link！

各位装咗乐视的球迷，LeSports HK平台直播的英格兰足总杯(FA Cup)决赛(阿仙奴对车路士)因为节目调整关系，就冇得睇现场直播，本来就觉得好失落，心谂有冇搞错！阿记对车仔㖞！不过，经过今日之后，呢种谂法唔该要抛诸脑后，因为TVB今日就宣布取得《英格兰足总杯决赛》—阿仙奴对车路士之香港区独家播映权，安排在周六（5月27日）晚深夜12时05分于翡翠台直播，即系话唔洗上网，直接打开电视，再一次同全世界100％同步，兼免费有得睇波，真系要跳起大叫Yeah啦！除此之外，仲有另一场赛事《德国杯2016/2017决赛》—法兰克福对多蒙特，紧接在后，于深夜2时30分转播；至于myTV SUPER免费区就在深夜1时50分直播。

延伸阅读：无线免费播足总杯决赛　阿记死忠袁文杰：起码唔使上网揾link！

《香港01》之前就有问过阿仙奴忠实球迷袁文杰，本来冇得睇乐视直播呢场世纪大战，佢都叠埋心水睇重播算，起码好过冇得睇，但系而家佢嘅老板TVB有得睇喇㖞，带来新机，佢就好惊讶：“下？居然有咁好嘅消息？”仲要反复再问：“系咪坚㗎？”、“系我就Share去啲足球群组到喇！”作为阿记死忠，袁文杰表示一定撑爱队：“好老实！一次半次，又系有阿仙奴份，梗系撑喇！我当返公司睇波咋嘛！起码唔使喺网上面揾link睇呀！”绝对系正确途径睇波㖭啦！阿记同车仔球迷睇嚟要多谢TVB。除此之外，袁文杰眼见公司直播赛事，自己都好恨有份参与讲波：“如果我揾我讲波就好喇，不过佢哋有自己团队，或者做嘉宾都好啦。”至于网民知道TVB直播足总杯之后，都好想游生讲波，留言表示：“我要游生讲波！”、“游生最好出埋力，讲埋波！”话唔定TVB留意到，真系叫游生讲波！