45岁袁文杰入无线首拍剧　唔怕有亚视味：我算系最冇𠮶阵味！

袁文杰过档TVB后，第一部参与的剧集《不懂撒娇的女人》就要出街。作为一个前亚视艺员，走入大台，最多人关注就是身上亚视味甩唔甩到。对此，袁文杰理解所谓“亚视味”，就是：“我谂老土系大众对呢样嘢（亚视味）的基本定义啦，我谂我同几个之前入去嘅几个前亚视艺人，系最无𠮶阵味𠮶几个啦啩！”可能都因为咁，都成功过档到TVB，袁文杰再补充：“我就梗系唔希望观众觉得我有𠮶阵味啦。不过我之前都有去其他电视台，好似NOW呀咁，我谂阵味都洗得7788啦啩。”

袁文杰入了TVB后，就话自己实干咗好多，“起码系好充实先啦，而家经常都有电话打嚟叫我入厂，有咩工作做呀，同之前都有好大对比。不过当然之前喺ATV，你知道公司咩环境，所以都唔系好出奇啦，但我有去过大陆啊地方闯荡过，会发现TVB真系会实在好多，系会有人话你知有咩做。”TVB对袁文杰都不薄，除了《不懂撒娇的女人》，还拍了《天命》、《杂警奇兵》，仲有台庆剧《深宫计》。

拥有咁多机会，袁文杰都觉得就算之前入错马房，辗转反侧来到TVB都唔觉迟，除了多谢公司，另一个原因就是45岁袁文杰觉得自己几襟摆：“我都算keep得唔错呀，都仲可以keep住做嘅。”袁文杰说罢摸摸自己脸颊。细看之下，袁文杰除了高大，脸上都冇乜岁月痕迹，又真系唔觉佢有45岁嘅，佢仲话自己极力keep住个body，会做运动，更即场分享驻颜心得：“返屋企食饭，见到有汤就要饮，咩汤都得，汤够滋润坚系work，仲有食多啲生果，饮多啲水，就算去多啲厕所都要饮。”唔知大家又觉得袁文杰keep成点？