娱乐圈中唯一“佛系男神”？　马国明中哂所有条件

最近香港又突然兴返起“佛系”呢样嘢，仲喺网上多咗好多改图，例如“佛系hehe”、“佛系沟女法”、“佛系打工仔”同“佛系港人发达大法”等等，睇完各张改图加埋嘅描述真系会心微笑。不过，其实咩系“佛系”呢？其实“佛系”系讲紧一种放下、唔执著、看破红尘嘅生活态度，而呢个Term最早系出现喺日本嘅一本杂志度，话有啲男仔将自己兴趣放第一位，对生活、感情都有自己嘅节奏，一啲唔想费神嘅事佢哋永远唔会花心机。

咁到底娱乐圈里面有冇艺人系属于“佛系”呢？有嘅，但唔多，而最系呢个系嘅人就一定系马国明。唔好以为系斋吹冇原因，其实有好多事例都可以证明到佢系呢类人，就好似之前佢喺台庆颁奖礼咁，虽然好多人睇好佢拎到视帝，但系最后佢净系拎到“最爱欢迎电视男角色”呢个奖，有啲人就觉得系关佢唔玩埋堆，唔高层擦鞋事。即使系咁，佢都睇得好淡好开，好似冇咩所谓咁，当时佢系咁同传媒讲嘅：“人人心水都唔同，今年拎唔到咪下年啰。”好多拎唔到奖嘅人讲呢啲说话系讲得好唔由衷，硬系总有少少唔甘心，但从佢嘅表情、语气度系睇得出佢呢句嘢完全冇任何酸味，𠮶种从容自在仲令到大家好认同、支持佢呢种缘份到就自然有，唔好强求嘅谂法。

虽然大家都知“佛系”嘅男仔大多数喺感情都系做被动嘅一个，但依度都要讲多几句马明喺爱情观上系点样“佛”法。个个都知马明除咗生得高大个样睇得仲好揾得，密密拍剧接广告嘅佢可以话系圈中数一数二嘅笋盘，自然好多女士想埋身，独霸唐僧肉。入行咁多年，佢都有唔少绯闻，但几乎每一次都系传佢被女方倒追，自己就一直都唔出手咁。虽然马明曾经否认过现任（绯闻）女友黄心颖主动追求他，更指自己每一次都系自己主动约女方出街，但好多人依然因为佢嫌麻烦、怕怕丑丑嘅性格，改唔到呢种谂法，觉得系一早视对方系偶像嘅心颖BB不断出击融化到呢座冰山。

喺打扮方面，马明亦都好有“佛系”𠮶种草草不工。马明嘅好拍档杨怡就喺好耐好耐之前公开咁嘲笑过佢，话佢喺衣著品味方面真系争少少：“马明咩都有，有楼、有演技，只系冇Taste。”而其实好多观众、读者都曾经喺唔同渠道见过马明平时嘅打扮，成日都鸡翼袖加松身裤，十足一个佬，而佢又真系完全唔Care大家点睇佢著成点，佢自己觉得舒服就得。所以，喺呢度都好多谢心颖BB肯帮马明拣衫衬衫，畀大家喺依家睇到一个除咗靓仔仲好有型嘅马明。

不过，马明接受《香港01》访问时否认自己属于“佛系”：“我要揾钱养屋企架，唔敢睇淡一切。（不过你其他方面又真系好中。）其实做咗要揾钱之外，我处事真系好跟兴趣而行，我钟意踢波就去踢波，钟意演戏就演戏，其他嘢唔会太上心，系揾钱呢方面唔可以咁，一家大细都要食饭。（自己真系‘不沟女’？）咁我之后都要结婚嘅，只系呢方面冇呢个胆乱嚟。”但其实日本都发明咗“社畜系佛系男”呢个Term，话有啲佛系男系净系谂点样打工揾钱。

至于心颖BB就觉得“佛系”呢个字词放喺马明身上硬系争啲：“佢所有嘢都好畀心机，好勤力、好努力，只系佢唔强求，我谂呢种系知足，唔会Aggressive唔代表冇要求，两样嘢嚟。（觉得佢依家呢种性格刚刚好？）佢的确系感染到我，某程度上我以前系比较将好多嘢睇得好重，依家就学识到睇轻啲。”咦，唔通心颖想做“佛系”女神？

睇图膜拜呢位“佛系男神”：