【万千星辉】马国明“天然呆”样不再：我有特别练过

凭TVB剧《降魔的》马季一角在台庆颁奖礼上拎到“最受欢迎电视男角色”奖项的马国明，在台上发表得奖感言时就表示多谢珍姐闹足自己17年，其后马明在后台接受《香港01》访问时话珍姐闹咩内容就唔记得咗，但就自爆份人唔系好听话并笑言，“因为上次我都加薪几多，咁佢又肯咪续约。嚟紧又要倾续约，我又要唔听话喇！”马明自己讲完都忍唔住不停爆笑！

今次拎到“最受欢迎电视男角色”马明话已经好开心，“作为一个演员，最重要系个角色令人钟意。”记者提到当时获奖少咗“天然呆”表情，佢笑言因为自己有练过，“我同自己讲无论有无奖，今晚一定唔会俾观众见到我天然呆𠮶个样。”咁女友黄心颖有无系后台俾一个（爱的抱抱）佢呢？马明指，“唔使喇使乜爱的抱抱，一个支持已经好开心！”

提到有不少网友对于马明失落视帝都替佢不值，马明就好乐观咁话，“每一个观众心目中嘅视帝都唔同唔系同一个人，有啲唔系投我或者投浩信，系投俾第二个，所以赢输我又觉得无咩所谓。最紧要大家开心，今晚系一个party。”