【求生指南】凑老细是门艺术　单身女上司工作是生命　自保就要…

【文章原刊于01撑场，欢迎下载香港01 app，与更多作者一同讨论喜爱话题。】

好好爱惜爱的女人味道。

男人老狗，当然知道爱护女朋友、锡老婆系天经地义。不过，如果你凑过女老板，你嘅体会，会系另一个层次。

置记咁多年以来，跟嘅上司男女数目相若。喺“伴君如伴虎”嘅法则下，其实无论同男老板定女老板相处，感觉都系如履薄冰㗎喇。不过多年来我一直相信“异性相吸”，男同女，一凹一凸，一阴一阳，理论上会比较容易调和。尤其是，女上司大多数都有特异功能，块面识写字，心情好坏、对一件事情嘅喜恶都一目了然，唔似得好多男人城府深、永远摸唔清佢嘅想法。

我有一个公认嘅“老江湖”、“老油条”嘅朋友，佢份工可谓一人之下，万人之上。但系要氹得女总舵主贴贴服服，佢都要十分小心处理，将自己嘅脾气㩒到落地底。有次佢同我讲：

“𪠳，老细要话事吖嘛，咪畀佢啰。啲谂法五时花、六时变？咪由佢啰。最紧要畀佢揸主意，你顺住佢个势行，千祈唔好逆佢意。”

喂阿哥，唔讲清楚，我以为你讲紧点样维持家庭和谐、夫妇恩爱之道㖞。

不过谂深一层，由以前做𡃁，畀啲 junior manager（即系 Team Head）管住嘅日子开始，我又真系对啲女波士千依百顺㖞。佢叫我行东，我永冇行西。嘴都唔驳多句呀。仲三五七时开会要扑出嚟飞身挡子弹，帮讲错说话嘅阿老板大人兜返。当其时，我嘅日子系过得相对地轻松嘅。

但有一段时间，我都经历过女老板带来嘅苦难。分别唔在于我年纪大咗就蠢咗（冇可能！），而系在于以前嘅Team Head都已经做咗人老母，返工都系为咗帮轻下老公，放工仲要返去睇仔女嘅功课；而后来嘅女性上司并无儿女，部分更加冇拖拍。

你冇听错，冇拖拍。如果我加埋“四十岁以上”同“专业人士”呢两个关键字，你谂到啲咩？冇错，就系都市传说之中嘅“怪兽女上司”。佢哋嘅生活或者过得惬意，物质享受或许无缺，但系事业某程度上就系佢哋生命嘅主菜。

当父母视你为生命嘅首要任务，你初则感受到无限的爱，后来会有压力，因为佢哋对你嘅学习、课外活动都关顾得无微不至，而且紧张不已。同样地，当上司视工作为最大责任，你交畀佢嘅每件作品都会经过显微镜验尸咁验，而且所有评语都发自内心，唔止系感人肺腑，直情顶你个肺顶到落横隔膜。

试问咁样，你边有好日子过？除非，你懂得招架。世间总有圆滑而谨慎嘅老手识得将干燥嘅表面润滑，化干戈为玉帛。不过以大家认知嘅置记嚟讲，都知道我经验值不足，只会越做越缩，缩到退一步跌落山窿。用畏首畏尾去形容𠮶段黑暗时期，我谂绝不为过。

事隔多年，如今我又要凑返已婚、人母女老板。人老精，鬼老灵，加上屋企有太座指点迷津，总算掌握少少窍门，例如话要畀佢面子、要令佢有安全感、要不断认同佢，之类。（即使佢系错，都要认同到佢自觉唔啱为止）虽然，知道同做到，系两回事。但唔知道又做到，𠮶啲叫符碌。人到中年，唔可以下下靠运气咯。认清楚女性需要更多情感上、感性上嘅支援，自然揾到位入⋯⋯去安全地工作。

今晚我揾返我个“老油条”朋友，话我终于明白佢以前招呼女波士嘅功架有几高深。佢赠返我一句：

“唔好太上心、太在意，更加唔好投放太多情绪。凑老细本身就系一门艺术，我都仲学紧。”

共勉之。

作者简介：置地记者

八十后，土生土长。中学志愿做战地记者，大学主修新闻与传播，毕业后曾写波经、跑体育新闻、通宵报新闻，方知衣不称身。 转工变转行，转咗入银行，穿梭后勤、中场、前线，由九龙东杀返入中环。近年转战金融服务业，见尽港、中、外资机构职场 XO 极品人和事。 返工写字，放工继续写字。相信文以载道，字以结缘。说话唔多，怕出口伤人。新作出版《漫游中环──银行金融入门攻略》将于2019年5月出版。

Facebook专页：https://www.facebook.com/landmarkreporter/

Medium：https://medium.com/@shuklai

【编按：文章题目为编辑所拟，原题为“你要小心女人，小心女人”​】

（以上文章内容均属用户提供，香港01不为任何用户内容而衍生或遭受之任何损失或损害承担责任。）

立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O