【职场生存手册】想升职不只靠劳力：识令老板钟意你先系王道！
喺香港打工好辛苦，唔系因为工作范畴辛苦，而系我哋要顾虑嘅嘢实在太多喇。如果你已经有几年工作经验，会发现落每一个决定之前，除咗谂“点做系对件事最好”之外，仲要谂“点做先令老板开心”，有时明知用方法A系比较蠢，但若老板系钟意方法A，你都要照做。做嘢做得好只系基本，识令老板钟意你先系皇道。
作者：诗宁
我哋改变唔到个社会，唯有跟个游戏方式玩，承认“适可而止嘅擦鞋”系有助仕途顺畅，但要“擦鞋”擦得正确，先要识得“收风”，如果你过于自闭，只系埋首工作而唔埋堆，咁你又点捉老板心理？另一方面，老板连你个名都叫唔出，想升人𠮶时又点会谂起你呢？
有心想升职？善用lunch time，忌做“独家村”
Marius系IT专材，对自己专业范畴做得唔错，亦都好勤奋，同事日日一齐出去Lunch，Marius就带饭，因为佢想快啲食完又继续工作。就系因为咁，佢每日都听少好多公司“资讯”，同事食饭除咗讲是非同呻多嘢做之外，仲有好多有用嘅“资讯”例如老板嘅喜好、嚟紧想转用乜嘢新System、办公室政治中边个上紧位……
公司入面所有新决策，Marius都系同Team之中最迟一个知，咁样有咩损失？喺新决策进行之前，其他人已经有晒心理准备，大概知道点样认对，而Marius要等到公司出正式Email先知道件事，自然会被杀个措手不及，喺老板眼中就系“点解你反应咁慢？”，适应期比其他同事长，跟唔上，辛苦嘅系自己。
“擦鞋”有技巧：切记走火入魔
“擦鞋”或者“收风”系一种技巧，踊跃得嚟要低调，太高调、过火就容易犯众憎。
Christy自认醒目女，佢只会做一啲有功领、老板见到嘅工作，老板唔重视𠮶啲Project佢就扮唔记得或者揾机会塞比其他同事。Christy的确系呃到老板，好快就做咗老板“传声筒”，即系老板有咩都会先同Christy讲，叫Christy转达比其他同事，慢慢地，Christy口头禅就系：“阿姐话”。
“阿姐话你地份Report错好多grammar，觉得你地英文唔够我好呀。”
“阿姐话点解你地可以准时放工，系咪太少嘢做。”
“阿姐话我太多嘢做，叫我分啲嘢比你哋㖞，我都唔想架。”
其他同事听到Christy下下挞老板出嚟，当然唔顺耳，慢慢对佢积落唔少怨气，但老板信佢，同事们唯有忍。
直到有一次，Christy要去欧洲旅行，放三星期大假，无咗个传声筒，老板终于要直接同其他同事对话，一倾就发现Christy一直喺中间将老板啲说话乱传达，更甚系无中生有假传圣旨，老板同同事知道后大怒。
当然老板唔会再靠Christy传声，同事亦认定佢系大话精，佢讲嘅任何说话都无人信，自此，Christy喺公司好似透明人咁。
想上位，单靠勤力或者单靠擦鞋都好易得个吉，如果真系想喺间公司长远发展，记得定期检视下自己喺公司嘅人际脉络。