想喺香港共建家庭：要三世前储钱、仲要学识忍受你唔钟意嘅人！

女生，我哋由细到大都响往爱情，希望拣到一个钟意嘅人共建家庭，可以同呢个人一齐制造好多美好回忆，成长以嚟为达到呢个目标，历尽暗恋、单恋、双恋、失恋......好唔容易揾啱对象，先发现想喺香港“共建家庭”，可能要三世前开始储钱。

作者：诗宁

人生道路有好多条，有人响往浪迹天涯，有人想落地生根，如果你追求嘅系“买楼、结婚、生仔”呢三样咁平凡而复杂嘅事，咁你先要学识放低个人喜恶，要甘心面对唔钟意嘅人同事。

为咗日日对住钟意嘅人，先要日日对住唔钟意嘅人

我出嚟打工未够十年，裸辞过……廿次？或者更多，返过嘅工咩类型都有，自己都数唔清了。一向话辞就辞，都无咩考虑，直至结婚𠮶年，第一次感到挣扎，买楼、装修已经使咗好多钱，仲要摆酒真系好大压力，但份工返得唔开心，日日都好抑郁。

我相信香港每一个打工仔都明白呢种抑郁情绪，呢个同事咁咁咁，𠮶个老板点点点，死忍烂忍，唔开心都博命做，有时一瞓醒就希望天黑，咩都唔想理。

但我哋身处嘅城市叫香港　——　一个貌似好多选择，其实连最基本嘅嘢都无得你拣嘅城市。飞机上望落嚟，香港好多楼，但好多人无得拣，要住㓥房；返工食Lunch，周围都系餐厅，但得一个钟头食饭，除咗快餐无得拣；求职网有好多工，但你内心知道周围都系伏，其实都系无乜好拣。

任我哋点努力，似乎都未改变到个社会（或者系一世都改变唔到），唔会移民，就唯有顺住游戏规则去玩，呢个城市样样都讲钱，只能不断返工不断揾钱，揾钱系为咗可以对住钟意嘅人，做钟意嘅事，但在此之前，首先要学识同唔钟意嘅人相处。

到而家，我嫁咗连仔都生埋，先发现呢句说话除咗用于职场，原来成个人生都一样，嫁“人”，背后系嫁一个“家族”，另一半嘅“家族”对你嚟讲其实系陌生人，纯粹系你钟意咗呢个“家族”入面其中一人，所以背后几十人都同你有咗“关系”，当中可能有人系你唔钟意，但基于种种原因你唔可以唔理佢，为咗同你钟意嘅人相对，先要忍受、迁就你唔钟意嘅人。但呢种忍耐系值得嘅，因为你钟意嘅人会有眼睇，佢见到你为佢所作嘅付出，佢都会感激你、更锡你。

“爱”本来就要学识付出，拍拖时候嘅付出可能系大时大节送礼物，婚姻嘅付出，就系双方喺唔同成长背景之下，如何相处？喺生活之间协调。

延伸阅读：

瑞典人生活哲学“Lagom”：从不OT，与恋人一起享受的刚刚好生活
【无法成为野兽的我们】你不是职场清道夫，唔需要乜都帮人执！

生完BB，整个人生更加喺自己控制范围之外，做咗半年全职妈妈，越来越发现个生活唔适合自己，原来返工比起打理一头家容易得多，有时会谂点解当初唔一直失恋到老，自由自在多好？左谂右谂，最后请个外佣帮轻下自己……屋企多个外人，总有问题、总有担忧，但为咗令小朋友生活好啲，已经唔到我谂钟唔钟意。忍耐是痛苦的，但时间一点一滴走，慢慢见到个仔生活质素提高，我又多咗时间休息、建立自己兴趣，妈妈心情同精神好，我的家也越来越多笑声。

一步一步走，我只系想喺香港过非常平凡嘅生活，原来最基本系要学识放低所有“唔钟意”嘅感觉。作为一个惯咗急速嘅香港人，为了自己的家，忍耐、静候是必须的。