去完工作假期，见工应该隐瞒吗？揾工同拍拖一样：最紧要夹！

“我去完Working Holiday一年，下星期见工应该点解释𠮶段空窗期？”、“我辞职原因系旧上司好贱格，见新工应该照直讲？”写咗职场分享差不多两年，几乎每个星期都有读者喺脸书Inbox问我呢啲问题，其实见工要答乜嘢先符合HR同老板期望？

撰文：诗宁

读者总系希望我直接畀个答案佢，但唔好意思，我从来唔会咁做，因为见工同拍拖一样，系无Model Answer的，每一个唔同嘅男朋友／面试官有唔同嘅喜好，而你每一次恋爱／见工都要付出唔同嘅心思，先知边个伴侣／边份工作同你系Perfect Match。所以见工过程，永远无一个答案会符合所有人嘅期望，你亦永远唔会知道听嘅人脑入面点样接收同翻译你个答案。举一个例子：

Jennifer做紧份工唔系咁开心，而呢个时候佢外公身体抱恙，长期需要家人陪同覆诊。经过一轮考虑、同家人商议之后，Jennifer决定裸辞留喺屋企照顾外公。　

大约九个月之后，Jennifer外公身体好转，Jennifer亦开始出返嚟做嘢，每当面试官问佢：“上一份工点解辞职？九个月工作空窗期你做过乜？”

Jennifer每次都实话实说，结果一次又一次的“回家等消息”，然后佢开始觉得面试官可能唔钟意佢为咗屋企人而辞职，所以佢开始讲各样大话例如去旅行、公司改革、想转工寻找挑战性……但由于系大话，被面试官问多两问就心虚口窒窒，或者系转数唔够快上文唔接下理，面试官见人见得多，好易知道Candidate系咩人、讲嘢几成真，所以Jennifer继续都系“回家等消息”。　

究竟要答咩答案先啱？　

除咗有关技能方面嘅问题系著重实质内容之外，其他如“点解辞职”之类嘅问题，当中所答内容未必系重点，重点系你“如何表达和包装”，面试官都有家人，其实唔难明白Jennifer为咗照顾家人而辞职嘅无奈，不过Jennifer忘记咗解释原因嘅同时要强调自己已经准备好重新工作，例如，喺照顾外公𠮶时有无继续留意行业发展？有无学习新技能、睇书或者进修下保持竞争力？

讲真一日有24小时，假设用10小时照顾家人，其实都仲可以每日抽1,2小时出嚟留意行业资讯，防止自己脱节。香港速度快，个个雇主都希望员工一返工就立即上手，发展所长，唔想请空窗期长嘅人系因为怕雇员要长时间适应同摸索，惊请咗人都系踢晒脚。

所以裸唔裸辞、基于咩原因而辞职都唔系问题，问题系份新工同你夹唔夹，同埋见工𠮶时识唔识突出自己嘅工作能力同经验，讲到尾，见工都要识执生。

女生总在你身边，请下载《香港01》App

立即下载： https://hk01.onelink.me/FraY/hk01app