厕所当玄关？何文田4球骑呢新装私楼　入屋即见马桶｜灯神

香港嘅居住空间一向出名楼价贵、住得细，喺寸金尺土嘅情况下，一众业主同设计师要绞尽脑汁善用每一寸空间，将单位实行最大化嘅利用，引致唔少“奇则”嘅出现，灯神对于呢个情况其实都非常理解。不过最近有代理朋友介绍咗一个何文田嘅“奇则”单位比灯神睇，而呢个嘅设计就真系令人完全摸不着头脑。

呢个“奇则”单位就系何文田私楼一个中层户，实用面积315平方呎，两房间隔。就咁睇代理啲放盘相，单位装修好新净，睇落好似无咩问题，不过出事个位就喺个厕所。据单位放盘相所见，厕所个淋浴间隔离竟然有道门同铁闸，一开门就正对住楼层走廊同对面个单位嘅大门。

厕所直接开喺门口位、开门即见马桶

咁咪即系话，住户每日返屋企都要经过厕所先入到屋？风水学上讲“门口见厕”系漏财格局，不利财运，所以好多私楼间隔上都会将厕所设计喺侧边，避免将厕所正对住门口。而单位呢个设计都唔系对住门口咁简单，直头就开喺门口位，一踏入屋已经可以安坐喺马桶上面，喺风水上咁样简直就同“倒米”无分别。

即使撇除玄学角度嚟讲，呢个设计本身都好唔方便，如果有家庭成员使用紧厕所嘅话，其他人咪无办法离开屋企啰？灯神对于呢个设计真系“𢯎晒头”，可能唯一嘅好处就系当人有三急嘅时候，可以快人一步解决呢个紧急需求挂。

客厅设有正门、原则厨房改建成现今的厕所

不过，灯神之后再认真望下先发现，其实厕所呢道门并唔系单位嘅正门，客厅位置其实仲有一道大门，相信住户实际都系用𠮶道门出入，所以并唔会出现以上提到嘅尴尬情况。

灯神好奇之下就揾返单位嘅原则出嚟研究，见到单位其实都做过唔少改动，原则的确系喺客饭厅设有正门，而单位宜家嘅厕所位置，原本应该系厨房嚟，原则嘅厨房就设有一道后门通往走廊，相信系方便逃生。最终业主装修时就将厨房同厕所嘅位置调转，并将原有嘅梗厨改为开放式厨房，厕所位置则保留返原有嘅后门，形成宜家所见嘅格局啦。

开放式厨房缺少消防装备属违规、后门铁闸阻碍逃生

灯神始终唔系专业人士，所以决定揾资深认证验楼师明哥评价下呢个设计。明哥睇完之后，竟然指出单位嘅改动有可能出现违规嘅情况。首先，将梗厨改装成开放式厨房要向屋宇署入则申请，亦要有足够的消防设备，包括烟雾感应器、消防花洒头、耐火墙，各项消防设备均须符合要求。但图片初步就见到厨房系缺少呢啲消防设备，有机会违反屋宇署条例。

第二，原先后门嘅设计应该系走火通道嚟，应该长期保持畅通，但宜家道门加装咗一个铁闸，当有火烛嘅时候其实会阻碍逃生，非常危险，咁样亦违反咗消防条例及大厦公契。

家居保险料不会受理

即使唔讲违规，设计方面，个厕所嘅淋浴间喺最接近门口位置，又无加装幕墙挡水，所以冲凉嘅时候系有机会渗水到走廊。而且单位宜家有咁多违规同隐患，万一之后唔好彩发生意外，家居保险亦唔会受理。

上手业主几年前作全屋装修、现业主去年买入后叫价400万放盘

灯神之后就揾一揾区内代理问一问，单位点解会设计成咁，不过代理都唔太清楚，只知道单位的上手业主系几年前进行全屋装修，所以先咁新浄。而现时业主则于2024年3月以接近330万买入单位作收租，目前单位已经成功租比内地学生，每月月租约15,200元。然后近期仲将单位推出放盘，最新叫价400万元放售，呎价约12,698元。

对于业主买入短短1年就放盘，代理话业主都无透露系咩原因，不过呢个叫价喺何文田区都算几吸引，因为区内好少售价咁平嘅单位，而且装修非常新净。

灯神又计一计数，按单位叫价计算，其实租金回报超过4.5厘，的确系唔错嘅投资选择。不过考虑到之后可能要重新处理装修违规嘅部分，系咪值得入市就要再谂真啲啦。