【理财】畀家用成长期负担？ 比起金额多少 设定理财目标更重要
“家用畀几多？”这是一个在网上讨论区永恒出现的问题，也是朋友间历久不衰的话题之一。每个人对给予父母多少家用有不同看法，不过两代人因银码不合而“嗌大交”甚至影响家庭关系的事情，想必大家都时有所闻。《戒穷》作者兼理财达人穷生对这话题便有一些建议，希望令亲子之间更易达成共识。
撰文：穷一生
有人觉得畀家用系必要责任，有人觉得畀家用阻碍下一代展翅高飞。我唔敢讲自己系当中嘅专家，但系我似乎可以提供一个思路，让大家有逻辑地思考一下亲子双方喺制订家用预算时，有乜嘢考虑因素，令大家更易达成共识，减少家暴（言语上甚至肉体上），尝试造福一下香港社会，令香港少一点怨气。
家用文化华人独有
讲起畀家用，都真系华人社会特色，源自于“孝”呢个字，英语世界系冇，因为喺外国人眼中，关爱系冇上下之分，所以就算你见到圣经有孝字，都系译者嘅问题，外国人会尊敬长者，但不知孝为何物，孝当中有顺从，有尊卑。
放诸今天，（家用文化）难免引起好多纷争，而我认为呢啲嘢都系冇必要，我哋就理性解决问题。家用就系讲紧小朋友长大成人，得到收入先会畀，我同意当中有多少系责任，有多少系关爱，今日我主要谈责任的部份，因为关爱不能量化，可以系多多益善，但畀得多，系咪就代表好，也不一定，所以我今次希望大家主动向父母提出家用安排，拿出计划书，提醒父母，自己已经长大，有自己嘅路，同时会负起责任。
畀家用学自立
香港楼贵就系人都知，年轻人系咪咁易好似外国咁18岁自立可以自己搬出去？唔系咁易。所以父母切勿以此威胁，因为当年你层楼都冇𠵱家咁贵，你唔为子女著想，子女亦唔需要睇你面色，大家讲求互相尊重体谅。
我系支持界家用的，因为呢个举动有利子女去了解到底一个家系点运作，点维持。一个月到底用几多电？伙食费有几贵？因为要制订家用预算，所以佢需要知道呢一切，为将来佢成家作好准备，唔好煮个饭又唔知买几多斤菜，又唔知原来搞个上网要几多钱，大个仔大个女要知道一下你生活系点形成。喺制订家用预算之前，请用时间了解家庭嘅每月支出，就住家用总开支为基础订立预算，而非好似传统出粮缴税的方式，呢个方法只会减少子女努力工作的热情，亦无助亲子关系，好似我畀咗钱就可以咩都唔理，将责任外判。
住屋成本尽量避免计算
上一段讲咗，香港居住成本高，如果你系业主，又已经供满层楼，即现实上你已经没有居住成本（不计管理费及差饷）。如此一来，最好唔好再要求子女畀太多家用，只需要畀基本伙食费就足够。
不过，前题系，大家可以一齐制订一个理财计划，透过每月定额的储蓄，用作投资／升学及置业之用。如果作为年轻一代，也可以反过来主动解释畀父母听，自己嘅人生计划。你未来数年，会点样行，用钱喺咩地方，相信父母行有余力，又见仔女咁有计划，都会乐于减少你家用开支，成就你嘅理想。
等你开饭又点算？
我喺《戒穷》入面都提过，贫穷分三种，第三种系家贫型，即系成家等你开饭，你一出粮已经要分返畀屋企开支，做成“穷忙”。呢个情况我已经分享过，你一定要同家人一齐订下共识，必要时你仲要把持屋企的财政。因为家贫系长期的，一定系屋企嘅理财方针出咗问题导致。所以，过程中除咗要计好你自己盘数，仲要结构性地帮屋企盘数进行改革。畀钱养家唔系问题，但既然钱由我哋提供，我哋亦有权利同义务为家中开支进行把关，做到全家一齐上流，真正戒穷。
实战：
以一个四人家庭计，楼供完，母亲同弟弟没有工作，爸爸同你有收入。爸爸最少应该为家中另外两名成员负责。以一家人开支两万元计，你嘅家用预算可能就系两万元的四分之一，即五千元。当然，如果自己能力做到，又希望帮轻屋企，畀多啲并无不可。但系点都好，你要好清楚两万元开支的生成部份，如果你力有不逮，不妨同家人商量，顺便检讨一下屋企开支有冇减少嘅空间。畀家用，唔系外判责任，畀咗钱，同样要关心屋企情况，呢个先系健康嘅家庭文化。
【作者简介】
穷一生，80后多媒体设计师、《穷家有道》网站主理人及《戒穷》作家。22岁由3万元总资产、12K月薪起步，26岁储到人生第一个100万，30岁再翻数倍，座右铭是“学会掌握理财技能，使我可以‘穷一生’的追逐兴趣”。著有《戒穷》一书分享理财心得。
（本文授权转载自POORLHK，原文标题为【如何制定合适的家用预算？】）
80后设计师，亦Facebook专页“穷家有道”版主“穷一生”与大部分香港人一样，没有父干、没有从事“揾钱”行业，只靠储蓄、学习理财及发展多元收入脱贫…
立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O