【理财】女友是理想另一半吗？ 从管理金钱态度可窥看一二！
不少人在选择另一半时，都会以对方的外表、工作、学历等作为考虑条件。其实，作为陪伴自己过下半世的人，双方的理财态度是否配合亦非常重要。
喜欢在网上分享理财心得，并著有《戒穷》一书的穷生，对如何选择“对的人”亦有一番见解，更撰文表示若男生识拣另一半，人生便已经赢了一半。
撰文：穷生
其实呢个题目我想写好耐，因为讲到理财，其实系一件终身事业嚟。我教你开支点减都好，都系一时嘅嘢，个个人嘅生活节奏都唔同，套武功都要有所变化。一项咁漫长嘅任务，当然系由陪你最长时间嘅人开始！老豆老母冇得拣嘅，好似穷生咁，出身喺单亲家庭，家母唔系坏人，不过银行永远唔会有5位数字，穷生中五开始已经要承担自己嘅学费同生活费，呢啲嘢系命嚟。但系你嘅另一半（男／女朋友）就可以拣，即系话你成年之后嘅人生，其实你可以控制到相当大嘅比例。
穷生呢篇文唔会教你沟女／仔，有兴趣交流沟女（我未沟过仔）可以个别PM我。我只系教大家点拣，同埋点解要咁拣。先旨声明，我唔系教大家好功利咁去拣对象，而系话畀大家听，作为一个好嘅伴侣应该要点。由于穷生系男人，篇文难免会讲多啲拣女朋友，女生们就忍让吓啦！
从生活费开始计算
除非你系一个玩家，沟女系为咗呃某种零食，否则你沟得个女仔返嚟都系想同佢长久行落去嘅。两个人喺埋一齐真心相爱当然系最重要，但相爱系你哋走埋一齐嘅契机，几爱都好，一齐生活，甚至系婚姻都要双方一齐经营。意思即系爱可以系完全非理性，但婚姻／同居需要最少70%嘅理性喺当中，因为另一半嘅性格同生活习惯会影响你未来下半世嘅日子。
穷生出身寒微，冇本事当女朋友好似养宠物一样咁照顾，亦都认为大家都系成年人，一段健康嘅感情系互相扶持，唔应该系一段主人同宠物嘅关系（更遑论宠物仲恶过主人啦）。穷生第一个贴士就系两个都要经济独立，无论男女，可以穷但不能穷到自己一个都生活唔到。
以一个人计（不计住），生活费一般系三千到六千左右，如果你另一半自理唔到，你一个人一个月平均要洗多大约三千至四千喺佢身上，仲惨过一个人供三份保险，呢啲数以年计的话就系六位数字，成个首付唔见咗。
当两个人一齐生活，都仲唔为另一半著想，咁呢个人都相当自私，唔会系一个好嘅伴侣，穷生教朋友拣女朋友都系首先一句：“当佢会比你更著紧你啲钱，叫你同佢出街唔使食咁贵𠮶阵，呢个女人就要扯住佢唔好放喇！”因为佢个心如果系想同你行，佢一定成个脑都系同你未来嘅画面，就算佢以前几大使都好，都会为咗大家未来幸福嘅生活而改变。只有当你水泡嘅人先会要你节日搞九十几样嘢去哄佢，又要Book晒餐厅送晒花咁，呢啲嘢系食咗先讲嘅人先会做嘅。
再想置业能力
讲到未来嘅画面，又点可以唔提成家立室，而香港人最烦就系买楼。香港点解成日畀人话买楼难，系因为大家都认为个男人要一个人孭起层楼。以一个三百五十万嘅上车盘为例，以银行按揭计算机计算，做九成按供三十年，首付连费用都要五十万到六十万左右，最低每月入息要求要32K先可以批到钱，月供12.5K。我先唔讲三百五十万你要住新界北，如果你想三十岁前买楼同女朋友住，你一个人做唔做得到？
穷生我喺好多文章都提过，眼前嘅钱系一件事，更重要系因为呢啲问题而对未来嘅影响有几大，即系“机会成本”。03年之后嘅楼市就系好例子，其实当年大把楼喺个市场冇人买，当年当然系因为惊经济唔好啦，但系到05-06年，明明见住升，点解好多年轻人仲系买唔到？其中一个原因系个男仔唔够钱，个女仔唔肯出钱，结果大家租住先，等个男仔储多两至三年钱先再买。
咁事实系点呢？租楼系好难储钱，加上之后几年楼价嘅升幅，最后个女人后悔都太迟。事实上，就算当时系出于自私，帮个男仔一把对自己都有著数，呢啲机会成本，大家又点甘心败喺一个唔爱你嘅女人手上？
何谓拍得过的拖？
一段好嘅感情关系，系会令两人都有所提升。任何一方都唔会短视，为咗大家嘅幸福共同努力，好多年后就算不幸分咗手，你都会发现无论财富上、知识上同心灵上都会赚咗，呢啲拖先拍得过。
想当年，穷生嘅女朋友（即穷太）认识穷生𠮶阵都系一个大专学生，日日放学去快餐店捧餐赚学费，佢当时嘅愿望只系毕业之后有份普通文职工，稳定过日子就算。直至穷生识咗佢，话畀佢听佢嘅可能性，传授咗穷生理财哲学畀佢，今日佢已经喺一家大机构入面努力紧，相信佢未来人工会高过我了（哭）。如果唔系识咗佢，今日我都唔会系一个会喺呢度分享知识嘅人，以前嘅穷生只会收埋自己暗爽，所以大家要多谢穷太。
两人有所提升就系一回咁嘅事，理好财，理好人生，就系对另一半负责。
【作者简介】
穷一生，80后多媒体设计师、《穷家有道》网站主理人及《戒穷》作家。22岁由3万元总资产、12K月薪起步，26岁储到人生第一个100万，30岁再翻数倍，座右铭是“学会掌握理财技能，使我可以‘穷一生’的追逐兴趣”。著有《戒穷》一书分享理财心得。
（本文授权转载自POORLHK，原文标题为【识拣另一半，人生已经赢左一半】）
“与男朋友出街食饭应否AA制？”是引发男女大战的一个世纪难题，因为即使社会愈来愈重视男女平等，但不少女性仍然期望男朋友可“养”自己……
立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O