【理财】拍拖食饭该否AA制？ 男友赚钱较多就应该佢畀？
“与男朋友出街食饭应否AA制？”是引发男女大战的一个世纪难题，因为即使社会愈来愈重视男女平等，但不少女性仍然期望男朋友可“养”自己。
不过喜欢在网上分享理财心得，并著有《戒穷》一书的穷生却对这风气表示相当不同意，认为“自己食饭自己畀钱”是常识，即使男朋友赚钱能力较强亦不是要每餐都由他付钱的原因。
撰文：穷生
一般香港男女朋友出街好多时都系由男生负责畀钱，其实所谓“同男朋友出街食饭应否AA（制）”已经系老掉牙嘅日经问题，直头可以做公开试嘅作文题目以取代“中学生应否谈恋爱”。而穷生嘅切入点都已经唔想讲呢个行为本身，𠵱家系𠮶心态问题。喺香港地原来有个会AA制嘅女朋友，作为男朋友已经要感恩，引用返穷生成日讲𠮶句就系：“呢啲文睇得多你会冇咁钟意女人。”
首先，作为一个女人之前你系一个人，一个独立个体。喺香港呢个开明发达嘅城市，男女喺身份地位同职场上都可以话做到平等（甚至可能系女性更高），喺咁嘅情况之下，尤其系初入职场嘅后生男女嚟讲，大家收入大体都应该系差唔多。如果系差唔多收入而非有任何一方有经济上嘅困难，点解要有一方畀哂嘅心态嘅呢？
又唔系冇赚钱能力
以穷生同穷太为例，我哋系冇计过边个畀钱，有时系我畀，有时系穷太畀，当有时我觉得佢已经畀咗好几餐（穷生成日冇Cash喺身），我会无啦啦畀返几百蚊佢。我哋两人从冇想过呢件事系要教育，因为大家都有手有脚，冇钱咪食平啲啰。
穷生会主动请嘅情况通常系，例如穷生好钟意食鳗鱼饭，而大家都知喺街食鳗鱼饭多数都比较贵，咁我想食，要穷太陪我食，我当然会请佢食啦！因为系我话要食贵嘢㗎嘛！但系正正常常大家一齐生活，大家又系有收入嘅人，穷太嘅心态会系：“我自己有揾钱点解要你请我食饭？”作为男人嘅我有咁嘅女朋友我会欣赏同感恩，但呢句说话唔会由女方把口讲出嚟。
伴侣赚得多就佢请？
另外一个思考误区就系，因为个男朋友揾得多就要人哋畀钱。喂！大佬！我揾得多得罪你㗎？呢个唔系揾几多嘅问题，自己食饭自己畀钱系教养问题，系常识嚟㗎嘛！你同有钱朋友出街，会唔会出亲街都要佢请你食饭？佢要请你都唔好意思啦！有本事就自己揾到自己食啦！又引用返穷太语录：“个男人揾到钱系个男人本事，只要个男人唔介意我冇钱要食平嘢，同我一齐食，点解要个男人畀钱？”所以穷生一向话自己除咗理财劲，拣女朋友嘅眼光一样系无得顶嘅！
如果一个女人同一个男人拍拖系有谂过同佢有将来，呢啲数（出街食饭）一定会同男朋友悭，而且未来系两个人一齐建筑嘅。穷生可以讲，揾得到钱嘅男人未必识得用食饭嚟试女方嘅真本性，但善于理财嘅人一定会识拣好女仔嚟发展。喜欢揾叻人做男朋友嘅女仔，又会唔会系叻人喜欢结识嘅女性呢？
希望呢篇文章可以为大家嘅两性关系心态解毒，做一个健康嘅香港人。感谢愿意同你AA制嘅女人，因为佢哋令劣质港女减少。
【作者简介】
穷一生，80后多媒体设计师、《穷家有道》网站主理人及《戒穷》作家。22岁由3万元总资产、12K月薪起步，26岁储到人生第一个100万，30岁再翻数倍，座右铭是“学会掌握理财技能，使我可以‘穷一生’的追逐兴趣”。著有《戒穷》一书分享理财心得。
（本文授权转载自POORLHK，原文标题为【两性解毒系列】食饭边个俾？）
立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O