【理财】学习极简主义理财　关键：减少不想要的便有余暇找喜欢的

不少人觉得理财这会是知易行难，收入有限但物欲无限，像是多多钱也不够。喜欢在网上分享理财心得，并著有《戒穷》一书的穷生，却有另一套见解，甚至建议大家可参考日本近年流行的极简主义，好在减省消费之余也可在“揾工/生活”之间取得平衡。

撰文：穷一生

近年极简主义喺日本开始起星星之火，唔知大家有冇睇过相关嘅文章，无论系一家人定一条友，佢间屋都系好似乜都冇咁，只有最基本要用嘅嘢，仲一定唔会预多。穷生睇咗呢篇报导之后，对极简主义好感兴趣，之后都study（学习）咗唔少，发现当中有啲嘢同穷生嘅价值观都不谋而合，而当中一啲精神其实都几适合香港人去了解同反思一下。

现实少少讲，极简主义系好适合香港嘅穷Ｘ。原因一字记之曰：细！香港人住都冇地方住，一家三口迫喺一个200至300呎嘅空间并不罕见，我好多时都唔明啲人，明明已经好迫，点解仲要搞到一屋都系嘢？

我同好多身边嘅人都倾过呢个问题，发生原因主要分两类。第一就系啲嘢有用怕浪费。好多嘢其实你唔会成日用，当要用嘅时候买咗，又要花空间去放。久而久之，就一屋都系𠮶啲好耐都唔会用嘅嘢。

第二就系收藏同回忆，呢个其实好多人都会有，人喺演化心理学上已经有储嘢嘅习惯，好大程度上系因为以前生活冇安全感，手边要有足够嘅嘢先有𠮶种安心嘅感觉。简单啲嚟讲就系心瘾，有钱、有时间、有空间，其实冇所谓，最大问题就系当你冇嘅时候仲要咁储法，会唔会分清楚个先后次序，会令你活得自在啲呢？

极简主义减少浪费

穷生其实都算系一个极简主义嘅入门级人士，因为我生活一向简朴，物欲亦都唔多。穷生生于呢个极端资本主义嘅香港，对消费反而系一啲兴趣都冇，行街好难见到有样嘢我系好想买。老土少少讲就系，穷生觉得要分清楚咩系Need（需要）同Want（想要）。只要分得清楚，你就会发现日常生活之中有超过一半嘅消费系不必要。而呢啲不必要嘅消费就令你要加倍地工作，到头来为咗一样你冇咁需要嘅嘢，迫自己去做一件你非常唔想做嘅嘢（返工）。

极简主义的“less is more”（简单就是美）精神

上面其实都开咗个引子，由于奉行极简主义者消费嘅嘢极少，你成盘数就变得非常易明清楚，思路亦会比之前清晰。因为喺你身边嘅嘢很少，反而令你更清楚自己嘅目标。唔讲咁深，就屋企而言，你会好清楚屋企作用系乜，有啲咩系应该要有而你未有，有啲咩系你唔需要，由物件慢慢推展到身边嘅事物。

穷生自己发展出嘅精神就系，透过极简的外功（减少不必要消费）而得出的内功，就系因为唔需要使好多钱，亦能够减少不必要工作。由自己最不想要做的东西开始慢慢减少，你就可以有余暇慢慢发展相对比较喜欢的工作。呢个转化过程，极简主义能够帮你较易达到目标。

平时你要20K去RUN（经营）嘅生活，如果你而家10K就可以RUN到，即系话你可以减少一点你的辛苦收入，去发展自己喜欢的收入来源，终极目标是100%喜欢的收入来源。你一日不放弃过度消费，你一日都系行紧一条有钱就得嘅工作之路，如果你可以三至五年揾够还好，更多的就是“月光”的永恒轮回。

极简／消费也要了解自己

所谓唔同人活唔同嘅人生，有人可以有个远大理想，有人只是平凡过生活。远大理想都有分要钱定唔使钱，如果你嘅理想要用好多钱先得嘅，你必须揾好多钱返嚟RUN你嘅人生，没有一本通书嘅存在。

不过，了解自己嘅目标系必要。先透过把自己嘅生活变简，方便找出自己想要的人生，系穷生暂时觉得最WORK（有效）嘅方法，尤其系香港生活困难，为咗过大家梦想嘅人生，好应该先储起弹药for（供给）日后真正嘅梦想，对于充满末世感觉的香港，穷生只能讲一句，共勉之。

【作者简介】
穷一生，80后多媒体设计师、《穷家有道》网站主理人及《戒穷》作家。22岁由3万元总资产、12K月薪起步，26岁储到人生第一个100万，30岁再翻数倍，座右铭是“学会掌握理财技能，使我可以‘穷一生’的追逐兴趣”。著有《戒穷》一书分享理财心得。

（本文授权转载自POORLHK，经01职场频道编辑，原文标题为【极简主义-穷L快乐的道路】）

立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O