【求职个案】超级资历却有2年凑仔空窗期　猎头助揾工前大改造

单亲妈妈在市场上会欠缺竞争力吗？有时CV和profile不够“靓”或已封尘一段时间，又可以如何重新与市场上的求职者竞争？文字所显的经验固然重要，但毕竟文件是死的，人是活的，凭热诚、投入、准备充足下，同样可以感动到对方。
猎头人久保从事猎头工作近8年，为不少求职者及公司找到合适的工作及人选，但当中，他都遇过不少奇情事件。以下为他于著作《猎头公司奇情实录》分享的个案。

撰文：久保 

每逢月尾，都系recruiters做最后冲刺的日子。呢个时候我主要做call客催offer、call candidate sell个offer、推动双方签约辞职。务求可以令到所有嘢都under control：譬如防止个客lowball个candidate（试过好多次同某几个客讲咗自己嘅candidate's expected salary，通常都话冇问题，但去到最后往往会少几千元）、又或者防止candidate接受counter offer，月底前签约下个月返新工。

自己印象最深刻系几年前，我有个客户要请receptionist。印象咁深刻系因为当时我同客户𠮶边嘅HR一齐合作，改变咗一个单亲妈妈嘅人生：帮佢揾咗份工。当时系Q1最后一日，close咗一张几有意义嘅placement: 一个只做过三份工、因为生小朋友冇做嘢两年嘅A grade candidate （Big4 + 香港上市公司 + fortune 500 *财富世界500大，世界知名公司排名榜）。

行内称之为 "classic profile"。最近求职处处碰壁，记得两个星期前同佢见面，佢有少少徬徨，唔明白点解自己仲未揾到工。呢个时候，我谂起初入行嘅时候自己成日见一啲junior candidate、因为家庭、私人原因冇做嘢一段时间又或者系CV唔够靓，自己好想帮佢哋揾到工，但往往send俾啲客都石沉大海。当时上司同我讲：

唔好再嘥时间系呢啲profile上面，因为大部分客户都唔钟意咁嘅profile，除非你去到一个位可以令到啲客好信任你，咁样就可以sell到。

自己嘅习惯系send candidate profile时往往写一段嘢介绍个candidate，希望可以立体啲形容、俾到个概念客户。今次呢个情况，一份进取嘅email同一段详细嘅candidate summary可以帮到佢。我将佢个profile send去一啲decision maker，例如系CFO、VP﹙副主席﹚或MD等，终于帮佢约到几个job interviews。𠮶晚半夜con-call个客出咗offer，下星期返新工！

当时客户系做成衣批发，办公室喺香港仔，返四日，星期五系半日，佢哋想请一个receptionist，人工$23000。因为地点关系，就算返工时间好好，都唔系太吸引。但系有一个candidate一星期内打过超过十次电话俾我又send咗佢份CV好多好多次，但系因为佢有几年冇返工，而我又好清楚个客需要一啲咩类型嘅candidate，所以我不以为意，直至收到呢位candidate亲笔手写嘅一封信，我决定要帮佢攞到呢份工作。

介绍返先，佢叫Ivy，个小朋友三岁，因为遇人不淑，所以离婚之后辞咗工照顾小朋友，靠积蓄同前夫嘅赡养费去生活，而家小朋友开始大，所以佢想积极投入返个市场赚钱养家俾好啲嘅生活小朋友同家人。Ivy屋企同我个客嘅公司距离只不过十五分钟，加上人工唔差时间又几好，对佢来讲系一份好完美嘅工作。所以佢好想见得成呢份工。

但系，我点样去说服个客去请一个有三年空窗期嘅candidate？呢个系一个难度，思前想后，决定做两件事：写一篇超过成千字的candidate summary；帮Ivy做三个reference check，再写三份报告。然后，约个客同我见面，亲自将所有资料交给客户，再落足嘴头去sell，终于客户破例去面试Ivy。

HR叫Ming，一位好妈妈，响公司做超过十年，Ming见完Ivy之后，可能因为大家都系女人有共鸣，佢决定推Ivy去final interview，见office manager。Ming系一个好HR，特登安排Ivy一星期之后先final interview，俾时间佢准备，因为，Ivy成个look需要大执。Ming细心地同我哋讲office manager的喜好、会问么问题、希望听到咩答案等等，佢真系好想帮Ivy，唔止Ivy，连我自己都觉得好感动，我决定行多一步，帮Ivy大翻身！

记得当时有七日时间，首先同佢执好返resume先，等见工时office manager可以睇到一份令人眼前一亮嘅resume。之后几日，因为Ivy要凑仔，所以我放工后都上Ivy屋企帮Ivy“补习”，同佢训练面试技巧，我哋做咗大约二十次模拟面试，尝试过各种不同面试会遇到的问题及情景，睇见Ivy由一开始嘅结结巴巴到后期有自信及应答自如，行动已经成功了大半！剩余两日，就帮Ivy转新形象，陪佢去买见工衫同set个新发型。执一执之后，我觉得Ivy一定会攞到个offer。

终于到咗面试当日，唔知点解自己对呢个case上心，投入咗感情，朝早请假去Ivy屋企帮佢照顾小朋友，而Ming亦系Ivy见office manager之前俾佢一段prep talk，最后，好人有好报，Ivy有Offer啦！

边个话女人生完BB、离开job market一段时间会贬值？Not on my watch。自己做咗几年猎头，终于去到“𠮶个位”：客户会听自己意见、可以影响到个客嘅hiring decision、而自己嘅行为又可以改变咗一个人嘅职场人生。而家已经唔需要好似以前咁上心，不过谂返起之前帮人“补习”同埋凑仔又真系几开心嘅。

立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O