【Work life balance】热爱工作你都唔系铁人　放自己一个短假期

成日话成功需苦干（父干呢个话题就唔好提啦），每个年代都有“过得好”同“过得唔好”的人，所谓 “The haves” 同埋 “The Have-nots” 的差异，并唔系今日先存在，虽然呢个两极分化系严重咗唔少。但同样地，呢个年代都一样有一班人食准呢个年代独有的机会，成功踏上“社会阶梯”（Social ladder）力争上游，好似好多搞App的后生仔女，同埋各行各业的Top Performers。

不过今次唔系讲奋斗，而系讲奋斗时必须有的“Downtime”。

SJ认识一位后生仔朋友，做金融年纪轻轻已经成功转做Fund，30岁前收入已经七位数字，有人话系好运“泊到好码头”跟到个伯乐老板，但据说其工作态度同努力程度，确实已经系同龄人，甚至所有在职人口的Top 1%。

此君正常日子Office Hour朝8晚8不在话下，放工后亦花大量时间研究环球市况，各行各业各公司的业绩，以及任何有用的经济金融知识。围内朋友讲过，勤奋加上过目不忘的本领，呢位朋友可能系全香港最熟巴菲特多年来一举一动的人。

即便如此，呢位朋友却对自身理财以及时间管理，严格到接近不合理的程度，或者佢真系太热爱自己的事业，几年来除咗过年，基本上都冇真正放假，就算去旅行都会同投资扯上关系，点都会安排下睇楼或者参观公司之类的行程。大部分收入用作私人投资，股票债券外国楼Bitcoin乜都有，而冇咩消费。

虽然热爱工作，但始终唔系铁人，听说其近半年开始经历身体问题同埋情绪起伏，神经系统有小毛病，虽庆幸称不上疾病，但一些莫名症状已经够烦扰，而且经常发一些非常激烈的梦，虽然唔系噩梦，但系好多梦境似乎系同工作压力有关，离不开被人追拔足狂奔，或者系好Specific的职场解难处境，例如赶Deadline之类。听佢投诉呢类小毛病，已经最少几个月。

然而，最近长周末结束，街头偶遇呢位朋友，并坐低饮杯咖啡，佢竟然表示去完个Trip返来，身心好耐冇咁放松，放假几日完全冇之前的神经系统症状，晚晚瞓得好。

原来佢同几个相识微时的中学朋友去台湾，仲好热血咁租架车半环岛游。呢几个中学时期的好朋友虽然并唔系咩才俊金融之类（当然都唔差），但几个好朋友从在台北的夜市嘻嘻哈哈，到国家公园沿途睇到一望无际的太平洋的路程，总系有着无尽的话题同欢笑。

中途仲发生小插曲：有架车在行车疏落的高速公路死火，在未知对方身分情况下，朋友几个人决定主动停车帮手，其中一个熟悉汽车工程的朋友帮手用“过江龙”驳电（虽然唔成功），但最终对方一家人仲请埋佢地去地道的餐馆食饭，了解了不少风土人情。可谓旅行难得的体验，真系咩旅游网站用钱都买唔到的体验。

呢位朋友话，过去呢几日，可谓自己频临Breakdown前，过了一个Much needed的短假期，起码延迟的Burnout的时间。而且，在假期中，佢仲话对自己事业有了新睇法，想通了一些之前的难题，可能对其事业发展有根本的改善咁话。

大佬，你系咪帮台湾旅游局卖广告？

咁就当然唔系，但点都好，同佢呢番对话同埋观察其精神状态，SJ都想同大家分享几个Point：

1. 朋友，同酒一样，有时系旧的好。当然，好似啤酒咁多泡沫就放唔得耐，但红酒烈酒就越老越甘醇，只要保存得宜的话。然而，有时即使系上乘红酒，放得耐亦可能会变坏变淡，呢个无可预期，只能珍惜你依然有的好酒。

2. 旅行，可以令人忘忧，更好的旅行，可以令人解忧。

3. 人生，唔可以逼得太紧。好似古巨基首歌词 “梦中也习惯，有压力要我得志……”及“人人在发奋 想起他朝都兴奋……”每个Waking Moment都为“奋斗”而努力很好，很上进，但记住给自己一点Downtime，一点休息时间，健康系最大财富，其次先系你的Networth与收入。

4. 当然，呢个道理可能只适用于1%的人，我们大部分人的问题来源，唔系太努力，而系太唔努力。

2018踏入 Q3，祝愿大家都找到属于自己的 Work-life balance，倾斜一边难以避免，但尽量尽量平衡一点，活在当下吧。

【原文转载自StealJobs.com。StealJobs全面透露各行各业人工，工时，晋升前景，以及入行攻略，欢迎匿名提供收入资料。】